Александар Поповски: Реваншизмот и поделеноста ќе не’ уништат
Театарскиот режисер Александар Поповски кој подолго време работи во странство, се осврна на поделеноста и реваншизмот кои владеат во македонското општество и култура, како и недостигот на културна меморија. Тој во своето обраќање по повод починувањето на Благоја Стефановски Баге, го критикува недостигот на почит кон значајните културни дејци.
„Ти си на некој начин симбол на таа наша тага и срамота. Со години се делиме и се гледаме преку нишан. Ние децата од истата фамилија. Од театарската фамилија. Тажно и срамотно“, напиша Поповски.
„Не е доволно само тоа колку некои луѓе направиле за нас, прашање е колку ние самите сме подготвени да земеме и да задржиме од тоа. Начинот на кој си замина Благоја Стефановски Баге е само еден сегмент од она што нас ни се случи во сите сфери, а особено во културата. Таа поделеност којашто ја живееме со години, во старо време би рекле одмазда, сега ја нарекуваме реваншизам – тоа е нешто што комплетно ќе не’ уништи. Или ќе ставиме точка и крај на тоа, само што не гледам дека некој работи на тоа, гледам повторно и повторно разгорување на истите приказни. На почетокот на 90-тите години ние сите бевме едно семејство, една театарска фамилија. Во меѓувреме се поделивме по разни основи. И не е ни важно кој прв почна. Ние сега единствено можеме да разговараме како повторно да се собере семејството. Прво треба ги признаеме грешките и ако не го направиме тоа нема да можеме понатаму да се развиваме, туку ќе одиме само назад. На сите ни е направена некоја неправда, но тоа што му беше направено на Баге е страшно. Тој беше човекот што не’ научи како се сака театарот, а тоа што му беше направено и со тоа што му беше одземено на Баге, на македонската култура и’ беше одземено многу“, рече за Утрински брифинг, Поповски.
Тој вели дека македонската култура не се сеќава на своите големи луѓе како што е случај со Хрватска или Словенија.
„Културата го изгуби својот простор во сите медиуми. Каде е сега Македонската телевизија, како национален јавен сервис да направи емисијаза Баге? Зошто нема разговор? Еј, се’ ќе заборавиме, се’ ќе се избирише! Ако не се запамети суштината и мислата, тогаш ништо не сме направиле и за тоа мора да се отвори простор. Се потепавме да зборуваме за Бугарите, а самите треба сегашноста да ја испишуваме, а се фативме за историја. Пропуштаме да ја испишеме историјата што се случува сега, денес и Баге е дел од тоа. Мора да ги запишуваме работите зашто без отворање на темите и без разговор може колку сакаме да се пенавиме за идентитетот. Горан си отиде така. Ниту една театарска сцена во Македонија не се вика Горан Стефановски“, додава Поповски.
