Макрадули: Реструктуирањето на Пошти го гледам преку процесот на дигитализација и електронска трговија
Управниот одбор на Македонски пошти вчера донесе одлука дека сите пакети од пет килограми ќе можат да се распределуваат во урбаните средини од адреса до адреса, за 80 денари. Тоа е новогодишна понуда која што ќе трае до 15 јануари следната година. Покажуваме флексибилност и кон лицата што се во изолација поради приссутво на вирусот Ковид-19, односно и на нив им доставуваме пратки до дома, рече денеска во Утрински брифинг директорот на Македонска Пошта, Јани Макрадули. Тој нагласи дека во периодот од март до јуни не било соодветно одговорено на делот за пратки но сега со нова стратегија ќе успееме тоа да го направиме, рече Макрадули. Плаќањето на сметки во Пошта ќе почне да се реализира до почетокот на март.
-Добивме позитивно мислење од Владата, договорот ќе биде потпишан со Халк банка. Ќе им понудиме на граѓаните најниска провизија при плаќање на сметките. Од друга страна платниот промет за нас како институција е многу важен, како инпут во буџетот на компанијата, и затоа имаме интерес што побрзо да започне тој процес, информира Макрадули. Според него, државните претпријатија не секогаш се најдобри стопанственици. Наша обврска е да ги подигнеме капацитетите на пошта и да ја направиме поконкурентна на пазарот.На тој начин вредноста на компанијата ќе биде поголема. Во овој момент сме во фаза на финансиско стабилизирање, на воведување на нови услуги кои ќе направат реструктуирање на Пошти, па потоа ќе видиме како тоа ќе се одрази на пазарот. Согласно Законот ние сме универзален снабдувач на поштенски услуги. Имаме 330 локации во сите рурални средини, и 504 шалтери во целата држава. Тоа не секој приватен сервис може да го направи и да биде рентабилен, рече Макрадули. Македонска пошта има долг од 10 милиони евра.
-Тоа е акумулиран долг кој се таложел од година во година. Долгот не е последица на менаџирањето на генералните директори на Пошта. Има некои одлуки од Влада кои придонеле за драстично губење на буџетот на Пошти. Претходната влада два пати донесе одлука за простување на долговите на јавните претпријатија кон Пошти, тоа многу ја чинело Пошта. Дел од акциите од продажбата на Поштенска банка не се наплатени од страна на Пошта а се наплатени од Владата кога се инвестирало во тој процес. Планираната загуба за 2020 била 77 милиони денари, но поради Ковид пандемијата и поради загубата на платниот промет ќе биде поголема. Наша заложба е во 2021 финансиски да се стабилизираме. Процесот на реструктуирање на Пошти го гледам преку процесот на дигитализација преку нудење на нови сервиси, електронската трговија ќе биде приоритет во идниот период, нагласи директорот на Пошти.
-Апелирам до младите наместо честитки на Вибер, да испраќаат вистински честитки до своите блиски. На тој начин ќе ја вратиме традицијата но ќе повежбаме и да пишуваме, бидејќи во ова дигитално време како да сме го заборавиле.Цената е само 9 денари со марка, а честитките се направени од рециклирана хартија, апелира Макрадули.