Бошкова: Покрај постапувањето на институциите мора да се подигне и јавната свест кога се работи за случаи како „Јавна соба“

Какви се’ кривични дела се сторени во случајот „Јавна соба“ ќе се знае кога Обвинителството ќе спроведе темелна, брза и ефикасна истрага. Од она што се знае во јавноста и од самите жтрви може да се идентификуваат повеќе дејства како загрозување на сигурност, злоупотреба на лични податоци, производство и дистрибуција на порнографска содржина со дете, а има и елементи на кривичното дело ширење на ксенофобични и расистички материјал.

„Не се согласувам со оправдувањето што досега го слушавме од институциите дека во случајот „Јавна соба“ нема кривично дело, или дека тешко можат да се подведат дејствијата на сторителите под некои од кривичните дела. Има и во постоечкиот закон, иако бараме измена и дополнување на Кривичниот законик според Истанбулската конвенција, можат да се најдат серија на кривични дела кои би опфатиле различни дејства“, вели за Утрински брифинг, Наташа Бошкова, правна советничка и адвокатка во Коалицијата Маргини.

Бошкова истакнува дека потпишувањето и ратификацијата на Истанбулската конвенција е основа да се вклучи демнењето во Кривичниот законик.

„Оваа конвенција Македонија ја ратификуваше во 2017 година и со тоа се создаде обврска за државата да го препознае демнењето како форма на родово базирано насилство и да го криминализира. И покрај тоа што минатата недела се донесе законот за спречување и заштита на насилство врз жените и семејно насилство, измените во кривичниот закон доцнат, така што сега сме соочени со правна празнина кога се работи за санкционирање на демнењето како кривично дело во нашата држава. Исто така, се плашам доколку паралелно не се градат капацитетите на институциите, полицијата, судовите, обвинителството за да можат да ги препознаваат и гонат не само демнењето, туку и сите форми на родово базирано насилство и ја подигаме свеста и на институциите и на јавноста за постоење на родово базирано насилство – нема да имаме успех“, вели Бошкова.