Спасов: Делото на Блаже Конески е обединувачко не само за македонскиот народ туку и за сите заедници што живеат во државата
Блаже Конески е сестран човек, неговото дело е вградено во македонската кулутра, пред се’ во македонската лингвистика, а потоа во македонската поезија и прозати во повеќе други општествени акции. Така што тој е еден од столбовите на современата македонска држава и нормално е да се одбележи неговата годишнина во државата, но и пошироко и тоа е направено во УНЕСКО, датумот 19 декември, родениот ден на Конески е ставен на листата на значајни јубилеи на УНЕСКО, што ќе се одбележуваат оваа година.
„Конески како личност и неговото дело е некој што обединува и тоа не само на македонската заедница, туку на сите заедници што живеат во нашата држава“, вели професорот Људмил Спасов, член на одборот за одбележување на 100 годишнината од раѓањето на Блаже Конески.
„Пред некој ден дефинитивно се усвои планот за одбележување на годишнината и како што се планира тоа ќе започне уште најмладата возраст, кога децата стануваат свесни за своето постоење, да научат некоја песничка, зборувам за предучилишна возраст и најосновното образование, потоа како што продолжува образованието да се посветат специјални часови, ако е можно и приредби во живо, но и да се популаризираат неговите дела, односно да се преиздадат неговите книги што веќе се прави: МАНУ ги доиздава неговите собрани дела и многу други издавачки куќи ќе имаат свои изданија. На телевиизиите да се емитуваат емисиите посветени на Конески и се разбира, Филолошкиот факултет кој го носи името на Блаже Конески ќе организира симпозиум „Филолошки денови“.
Ние Блаже Конески ќе го чествуваме за нас, не за оние или овие соседи, токму за да ја засилиме свеста дека претставуваме народ со културна, јазична и секоја друга традиција, вели за Утрински брифинг, професор Спасов. Тој истакна дека оваа година ќе бидат објавени критички изданија за делото на Конески што е исклучително важно за идните генерации на проучувачи. За изјавата на претседателот на МАНУ, Љупчо Коцарев, дека се планира укинување на катедрите по македонскиот јазик и македонската книжевност на УКИМ, Спасов рече дека Коцарев избрзал и дека се работи за незнаење.
„Не е така. На секои четири до пет години, што е прифатено секаде во светот, се обновуваат академските планови и програми и сега е токму тоа време кога се планира како ќе изгледаат новите студиски програми итн. Меѓутоа, за жал, работата се исполитизирала од претходно, иако за волја на вистината, имаше такви обиди во времето на Милошевиќ, да се симне нивото на македонскиот јазик со намера да се прави унитарна Југославија, но сега не е тој случај. Мислам дека сега не е време за политизирање, повторувам, Блаже Конески е обединувачка фигура и овие активности треба да бидат обединувачки а не да се користи за дневни политички и меѓупартиски пресметки“, вели Спасов.