Симоновски, од Здружението „Музика сега“: Немаме никаков ангажман и сведени сме на 0 денари
Здружението ЗУПМ – Музика Сега, информираат дека имаат свои барања до Владата, бидејќи, како што посочуваат – музичарите се наоѓаат во крајно лоша и незавидна состојба поради актуелната забрана за настапи.
-Со оглед на тоа што ние како фела, никако не може да се пронајдеме и не припаѓаме во 5-от пакет мерки (точка 11) и сме една од најпогодените гранки во државава, имаме забрана за дејност веќе безмалку 12 месеци и само една еднократна финансиска помош од 43.000 денари која беше доделена во декември, бараме од Владата да не обештети со сума еквивалентна на претходната дадена помош најдоцна до крајот на месецот март оваа година.
Ова наше барање не е некаков „хир”, туку реална надокнада, за што побезболно да ги покриеме основните режиски трошоци кои се за нас од основно егзистенцијално значење – наведуваат од ЗУМП.
-Доведени сме во ситуација да не знаеме што да им одговориме на нашите членови кои се желни за информација и помош. За разлика од другите струки ние де факто сме индустрија која е 100% застаната. Немаме никаков ангажман и сведени сме на 0 денари, изјави во Утрински брифинг Трајко Симоновски, претседател на Здружението „Музика сега“.
Се обидуваме цело време да дојдеме да разговараме за нашите барања, но се уште не сме стигнале до релевантните луѓе и мораме да преземеме нешто во наши раце. Со оглед на тоа дека фактичката ситуација не ни оди во прилог, ни останува да бараме финансиска помош. Сите сме ние работоспособни и можеме да ги земеме инструментите во раце. Нека ни дозволат да заработуваме, да можеме да им донесеме на фамилиите лкеб и нема да има никаков проблем, вели Симоновски.
Целиот разговор погледнете го во видеото