Јовановска: Фемицидот е најтешка форма на насилство врз жените, треба да влезе во Кривичниот законик

Фемицид е убиството на жена затоа што е жена и претставува најтешка форма на насилство врз жената и е една од водечките причини за прерана смрт кај жените во светот

. „Самиот поим фемицид значи намерно убиство на жена заради тоа што е жена, тоа е дело кое најчесто се извршува од страна на маж и е најекстремна манифестација на насилство врз жените. На глобално ниво се смета дека една од две убиени жени, е убиена од страна на нејзин интимен партнер или член на семејство и всушност од тука произлегува и таа културна димензија на самиот фемицид, односно форма на родово базирано насилство кое што е резултат на патријахалната традиција и своите корени ги има во родовата нерамноправност, родовата дискриминација и генерално инфериорната положба на жената во едно патријахално општество и она што се’ уште го одржува фемицидот е фактот дека тој широко се толерира, се’ уште поминува неказниво и не се прават системски промени за негова ефикасна превенција.

Во Македонија, од податоците што се достапни, а кои што и на глобално ниво се многу малку, повеќе од 80 отсто од жртвите се убиени од страна на интимни партнери, без разлика дали станува збор за брачен или вонбрачен партнер, сегашен или поранешен, додека останатиот дел на убиства се од други блиси членови на семејството. Овој вид на убиство се јавува при напуштањето на партнерот, бракоразводна постапка, постапка за доделување на децата, но најчесто се јавува во случаи кога имало зачестено физичко насилство кое било или не било пријавено од страна на жртвата“, вели за Утрински брифинг Бојана Јовановска од Хелсиншкиот комитет за човекови права.

Таа додава дека и Хелсиншкиот комитет и Платформата за родова еднаквост го бараат овој вид на кривично дело да влезе во Кривичниот законик, бидејќи се смета дека речиси секој фемицид можел да биде превениран од страна на надлежните институции, особено кога на делото му претходеле пријави за физичко насилство. Според овие организации, фемицидот треба да се третира како посебен вид кривично дело, односно убиство каде што мотивот е поврзан со родот на жртвата.