Демант од Проф. д-р Јанкуловски во врска со вчерашното интервју на Проф. Маја Стевановиќ
Во интерес на целосно и објективно информирање на јавноста, а во врска со разговорот во Утрински брифинг, каде универзитетската професорка Маја Стевановиќ, од Независниот академски синдикат, одговораше на прашања меѓу кои и кој ќе го парафира колективниот договор во Министерството за образование за покачување на платите како и кој врши притисок врз вработените, денеска со демант се јави Ректор Проф. д-р Никола Јанкуловски.
Истиот ви го пренесуваме во целост:
ДЕМАНТ ДО МЕДИУМИТЕ
На Фејсбук профилот на Утрински брифинг објавено е интервју со проф. Маја Стевановиќ, од НАкС (Независен академски синдикат) во кое беа изнесени груби невистини за наводно узурпирање на академската слобода и притисоци врз вработените на Универзитетот за членство во синдикатот на УКИМ.
Мојата обврска како Ректор на најголемиот Универзитет беше да ја споделам информацијата која потекна од Министерството за образование и наука за ветеното зголемување на платите и потребата истото да се реализира со потпишување на колективен договор на ниво на универзитети. Синдикалното здружување е доброволно.
Не можам да не ја споделам таквата информација од МОН, бидејќи платите во високото образование се многу ниски. Во ниту еден момент не е направен притисок врз кој било вработен и за само два дена постигната е репрезентативност од над 30 % од вработените на УКИМ од кои повеќе од половината се наставно-научен кадар.
Самото тоа е доказ дека ниту се имало намера да се изврши притисок, а ни желба ни време тоа да се направи врз околу 1000 вработени. За жал синдикатот НАкС (Независен академски синдикат), каде членува проф. Маја Стевановиќ, не успеа да постигне репрезентативност за речиси 4 години од неговото формирање, што е веројатно и причина за ваквиот однос кон оваа ситуација.
Грубо бев обвинет дека сум го казнил Факултетот за драмски уметности при УКИМ со 20.000 евра, што претставува ноторна лага. Невистина е, и повторно лажно обвинување е дека не сум ги праќал барањата за нови вработувања во МОН за потребите на Факултетот за драмски уметности.
Со ваквите лажни тврдења на проф. Стевановиќ се нарушува мојот и угледот на целиот Универзитет. Ја известувам јавноста и медиумите дека во секој момент можат да ги проверат овие лажни обвинувања.
Ректор Проф. д-р Никола Јанкуловски
За потсетување, вчера професорката Стевановиќ изјави:
Ректорите на УКИМ и УКЛО се оние кои инсистираа да се формира нов синдикат, додека подлабоко, се надевам дека ќе падне снегот па да ги откриеме трагите. Во мај месец имаме избори за нов ректор на УКИМ така што ова е дел од една предизборна кампања. Заробениот УКИМ како дел од заробена држава никогаш не се одзароби,
Проф. Маја Стевановиќ
