Иницијатива за спас на Расадник најавува протест против изградба на нови згради

Неформалното здружение „Иницијатива за спас на Расадник“ најавува мирен протест во обид да се изборат против најавата на Општина Кисела Вода, во Расадник да изгради стотина нови згради.

– Одлучивме да го спасиме Расадник од бетон, и нема да отстапиме од тоа. Тука планираат да изградат околу 90 нови згради, по нашата проценка со тоа би се населиле околу 10.000 нови жители, колку еден помал град. Нас и сега ни е тешко, немаме тротоари, немаме улици, немаме место за паркинг. Нема пристап ниту за противпожарно возило. Сега се гради катна гаража за 50 возила, таму досега можеше да се паркираат околу 35 возила, значи само за плус 15 возила се трошат пари за градба, не се прави ништо плански, само колку да се рече дека нешто се работи, вели Слободан Вуксановиќ.

Тој објаснува дека со 400 потписи собрани од жителите на Расадник, поднеле забелешки заа ДУП-от, на јавната расправа која беше организирана од страна на Општината. Но, од таму им дале објаснување дека Планот сепак ќе се усвои, без да се ревидира.

Триесет проценти од земјиштето во Расадник е приватно земјиште.

-Многу лесно може Општината да се договори со сопствениците на земјиштето. Поголемиот дел од земјиштето е државно, мора Општината да размислува за хумано живеење и домување. Мора да се размислува во насока на тоа дека не смее да се попречи струењето на воздухот од Водно кон Кисела Вода и Аеродром. Без тоа струење воздухот во Скопје ќе биде многу позагаден. До десетина институции доставивме барање да се ревидира ДУП-от, не немаме одговор од никаде. Затоа планираме да организираме мирен протест, најави Слободан Вуксановиќ од неформалното здружение „Спас за Расадник“.