Нушкова Аврамовска: Позитивни се измените во Кривичниот законик против насилство врз жените, но потребно е да се вклучат повеќе дела

Статистиките и истражувањата и на светско ниво и кај нас покажуваат дека насилството врз жените е генерален општествен проблем и тоа насилство најчесто потекнува од брачен или вонбрачен партнер. Со измените во Кривичниот законик кои се наоѓаат во собраниска процедура се предвидува родово сензитивен речник наместо родово неутрален, а се воведуваат и нови кривични дела.

„Ја поздравуваме одлуката за започнување на овој процес на измени на Кривичниот законик, кои се во согласност со Истанбулската конвенција. Се воведуваат нови кривични дела кои се во духот на Конвенцијата, односно забрана за женско генитално осакатување, се воведува и делото „демнење“, потоа сексуалното вознемирување и се проширува поимникот за родово базираното насилство. Исто така, кај сите тие кривични дела кои се на пример, физичко насилство, телесна повреда, тешка телесна повреда и најтешкото кривично дело – убиство се воведува отежителна околност доколку се случило како семејно насилство, односно родово базирано насилство врз жени. Една од новините што се воведува е и согласноста во кривичното дело силување. Согласноста ќе биде основен елемент кој што ќе го квалификува делото како силување, а не како што беше досега дефинирано со сила, закана со сила и пружање на отпор.

Она што не го видовме во предлог измените на Кривичниот законик е сексуалното вознемирување во интернет просторот, многу актуелна тема која што последниве две години беше многу актуелна во јавноста, не само со „Јавна соба“, туку и со други слични групи во кои се разменуваа фотографии без никаква согласност и знаење на жени и се даваа сликите и личните податоци во сексуална конотација. Друга работа што сметаме дека треба да биде опфатена, во однос на кривичното дело силување, е како отежителна околност да биде предвидено ако делото го сторил сегашен или поранешен интимен партнер. Исто така, во предлог измените како посебно кривично дело не го гледаме психолошкот насилство, кое што е потешко за докажување и за пријавување. “, вели за Утрински брифинг, Ана Нушкова Аврамовска од Национална мрежа против насилство на жени и семејно насилство.

Според неа, и со зголемувањето на казните и со целосното опфаќање на сите форми на насилство, на сторителите ќе им се даде јасна порака дека нема да може лесно да поминат, без соодветна кривична санкција.