Џијан Емин пред настапот со легендата Курт Елинг: Нашите џез музичари се светски
ЗЏМ Биг бенд оркестарот на 7 ноември на ќе настапи на 12. издание на Загреб џез фестивал, каде ќе настапи со светски познатиот Курт Елинг, кого го нарекуваат најдобриот џез пејач на сите времиња.
„Контактот со фестивалот во Загреб го направи Оливер Белопета и ние сме му бескрајно благодарни за ова наше претставување во тамошната музичка јавност. Претпоставувам дека нашата активност во изминатите 5-6 години преку голем број концерти од различен тип со Здружението на џез музичари (ЗЏМ) и со Биг бендот на Здружението допринесе да се позиционираме во јавноста како оркестар, дека се работи за сериозни музичари и сакаме да дејствуваме во областа на сценската уметност. Концертот на Курт Елинг требаше да се случи и во Скопје, но поради неговата презафатеност, тој ќе се одржи само во Загреб. Инаку, Здружението на џез музичари (ЗЏМ) постои веќе шест години, се формираше по иницијатива на Гоце Стевковски, кој е и претседател на здружението, со него свириме и се дружиме многу години и дојдовме до идеја да направиме некаков тип на здружение за да може да имаме појдовна точка од која ќе можеме многу полесно да стигнеме до реализација на нашите идеи. И тоа почна да функционира, почнавме скромно, со еден концерт годишно, а изминатата година имавме шест или седум концерти, наредната година ќе има уште повеќе.
Сакам да кажам дека во вакви услови тоа е многу комплицирано, бидејќи ние функционираме како независен оркестар, а да постои во Македонија независен оркестар од таков калибар е навистина многу тешко. Во оркестарот членуваат 20 музичари, од кои поголемиот број се невработени, а за жал, најголемиот дел од тие што се невработени се едни од најдобрите музичари во државата. Половината од нив се школувани на џез академијата во Грац, учеле и свиреле со најдобрите џез музичари на денешницата и одлучиле да живеат во Македонија иако можат да настапуваат каде што ќе посакаат, сметавме дека таа енергија треба да се канализира и очекуваме повеќе поддршка во наредниот период“, вели за Утрински брифинг, нашиот познат музичар, Џијан Емин.