Кој предупредил, а кој постапувал? Инспекторите Богдановски и Блинков во УБ за медицинскиот отпад
Државните инспектори за животна средина (ДИЖС) работат конзистентно со целосно дежурство. Водат детални евиденции а наодите се испраќаат во Инспекцискиот совет.
Сите нерегуларности регистрирани на терен се евидентирани, вели координаторот за меѓународна соработка во ДИЖС, Дарко Блинков во Утрински брифинг.
Блинков, кој е инспектор со 20-годишно искуство, во Утрински брифинг опишува во што се состои работата на инспекторите, во услови кога граѓанскиот скептицизам во однос на тоа кој се грижи за животната средина е на високо ниво.
„Со доаѓањето на новата власт има дежурство во сабота. По тројца дежураат до 16 часот, а потоа инспекторите влегуваат во пасивно дежурство. Тие се во своите домови, меѓутоа на интернет страницата комплетно може граѓаните да комуницираат со нас“, одговара Блинков, потенцирајќи дека, штом се прими преставка од граѓаните, се вршат вонредни инспекциски надзори.
Во однос на шпекулациите со бизнисот со отпад во Македонија, испрати охрабрување до граѓаните и граѓанските здруженија, за било какво сомневање да поднесат иницијативи за супервизија за работата на секој поединец или работата во самиот Инспекторат.
За последниот случај кој ја бранува јавноста, несоодветниот третман на медицински отпад кој битолската компанија „Еко клуб“ го согорувала во депонијата Дрисла, Блинков не сакаше да ги коментира обвинувањата од скопскиот градоначалник Петре Шилегов дека не работеле по предметот иако Инспекторатот бил известен.
„Не се впуштам во коментари за реакцијата, секој треба да си се занимава со своето. ДИЖС редовно и професионално ги регулира вкупно 1350 субјекти по различни 25 закони. Еко-клуб неколку пати била инспектирана, не се согласувам дека за таа компанија се постапувало поразлично“, вели тој.
Инспекторот од град Скопје пак, Мирсолав Богдановски, во Утрински брифинг, напомена дека тие имале испратено допис до ДИЖС пред три месеци, меѓутоа не било постапувано.
На обвинувањата дека немале ингеренции да постапуваат, вели, тие се неважни кога е во прашање здравјето на граѓаните. Блинков пак, тврди дека ДИЖС постапувале.
