Фидановски: Сите ќе загубат по нешто од авантурата со обидот за уривање на владата

Аналитичарот Кристијан Фидановски, докторант на универзитетот Оксфорд во Велика Британија за денешен Утрински брифинг анализираше какви пораки испратија политичките партии со тоа што ги поврзаа локалните избори со централната власт и обидот за уривање на владата на Заев и формирање на ново парламентарно мнозинство.

-Не беше добро што влеговме во нови драми. Но добро е што се избегнаа вонредни парламентарни избори, што е товар за граѓаните и дистракција за политичарите. Повеќето, ако не и сите ќе излезат како губитници по ова, секако секој на различни начини, вели Фидановски.

Тој оценува дека СДСМ имаа прилично лош резултат на локалните избори и дека веројатно најкобна грешка во целата оваа ситуација е ветувањето на Заев дека ќе поднесе оставка и од премиерската и од партиската функција.

-Нема да навлегувам во мотивите и дали треба локални избори да се поврзуваат со централна власт, но најважна е доследноста на политичарите и тоа е она што го ценат гласачите. Такви примери имаме во европските земји, каде кога политичарите ќе ветат оставка се повлекуваат. Да, губат од тоа, но свесни се дека не повлекувањето е уште поштетно за нив, коментира Фидановски.

Фидановски коментира дека ВМРО ДПМНЕ забележаа значаен резултат на изборите, но од друга страна со обидот за уривање на владата ѝ изгубија време на државата. Сепак, според Фидановски, од еден аспект оваа партија доби во овие две недели оти ја ослаби позицијата на другите.

-Во Германија на пример, има различни коалиции кои не секогаш се принципиелни но се нужни за владеење и ВМРО и Алијанса така го оправдува нивното коалицирање. За албанските политички субјекти не се исплати коалицирање со ВМРО ДПМНЕ кои сѐ уште имаат антиалбанска насока и личности во партијата кои кариерата ја имаат изградено врз тоа. Партијата сега се обидува албанофобните елементи да ги маргинализира но тоа не се прави со две три албански знамиња пред Белата палата. Ако Алтернатива влезе во владата на Заев тоа нема да ги чини повеќе, оти коалицирање со непопуларна партија не секогаш ги чини скапо албанските партии, вели Фидановски.

Во однос на позицијата на Левица како иницијатор на уривањето на владата, Фидановски вели дека нивниот неуспех беше демо верзија на резултатите во идните ниски коалициски капацитети на оваа партија, иако ВМРО ДПМНЕ оствари незначителен поголем број гласови, СДСМ изгуби многу гласови, а Левица доби премногу нови гласови на локалните избори што и ги охрабри на чекорот што го презедоа. Сепак, вели Фидановски, за една антиестаблишмент партија, каква што сака Левица да се прикаже, штетно е коалицирањето со ВМРО ДПМНЕ.