Марковиќ: СДСМ треба повеќе да имаат контакт со базата, да „купи“ од стратегијата на ВМРО-ДПМНЕ која е теренска партија

Се најавуваат кадровски свежувања во СДСМ што потоа ќе се прелее во преостанатите две години од мандатот на оваа Влада. Но, од она што се зборува, во СДСМ се враќаат луѓе од порано, т.н. Скопско крило, луѓе на Бранко Црвенковски. За тоа дали ова може да претставува нов почеток на оваа партија во Утрински брифинг разговаравме со проф. Ненад Марковиќ.

-Малку е предимензионирано тоа фракционерство, кое се гледа како чин на помирување во партијата. СДСМ веројатно сака да ја врати таа институционална меморија, како континуитет на она што порано се случувало, а што е нешто што недостасуваше во последната гарнитура, вели Марковиќ.

Се чини дека се менува и речникот на ВМРО ДПМНЕ и како да спласнува речникот на Христијан Мицкоски кој гласеше за арогантен политичар, со што се привлекува граѓанскиот слој. Што треба да стори СДСМ?

-СДСМ треба повеќе да имаат контакт со базата. ВМРО ДПМНЕ е теренска партија, сака да комуницира со народот. Тоа има и лоша популистичка страна, но има и добра страна оти секогаш се во тек. ВМРО ДПМНЕ прилично се смени во последно време што е за пофалба, а СДСМ треба да „купат“ од нивниот начин на комуникација со членството и ПР стратегијата. Сега постои незадоволство кај либералниот центар и ВМРО ДПМНЕ сака да го искористи тоа, но прашање е кога ќе се вратат на националистичката ретрика која не им треба оти тоа се го прави Левица, вели Марковиќ.

Димитар Ковачевски е потехнократски настроен политичар. СДСМ во послениве години настојуваше да дојде до власт и да се задржи. Проектот „Едно оштество за сите“ почна и замре оти не наиде на партнер.

-Немате партнери за тоа оти албанските партии и ВМРО ДПМНЕ привлекуваат гласачи на национална основа, вели Марковиќ.

Македонската политичка сцена отсекогаш била компликувана, но постојано имаше дијалог меѓу либералната левица и националистичката десница, што замре со Никола Груевски.

-Не смееме да се потпираме на вредностите за преживување кои се спротивни на леволибералните вредности. А соочени сме со низа кризи, економска, енергетска, ковид, а и ЕУ постапи лошо со новото повлекување. Но, тоа не треба да се гледа како пораз туку повеќе освестување за нереалните работи и да продолжиме без еуфорија и трезвено да продолжиме понатаму. Јас верувам во ЕУ, верувам во тој пат, а никој не понуди нешто подобро, вели проф. Ненад Марковиќ за Утрински брифинг.

Целиот разговор погледнете го во видеото