Аналитичари: За првите 24 часа Русија има повеќе жртви отколку за осум години во Сирија, прашање е колку жртви јавноста може да толерира

Љупчо Поповски во неговата викенд колумна е на работ дали ќе ја развива Русија како модерна земја или ќе му се врати на империјализмот, а Мерсел Биљали вели дека Западот потфрли во проценката од опасноста од Путин.

-Претпоставувам дека Путин не можел да претпостави дека ќе има толку жестока реакција во самата Русија од интелектуалците во неговата земја, вели Мерсел Биљали за Утрински брифинг. -И западната јавност изреагира многу жестоко, а бидејќи политичарите реагираат на реакциите на граѓаните и нивната реторика и постапки почнаа да се менуваат, додава тој потсетувајќи дека јавноста ги обвини своите влади дека ѝ дадоа лажна надеж на Украина па ја оставија на цедило.

Не е само пресвртот на политиката на Германија која беше толерантна кон Русија поради зависноста од енергенси, туку изненадување е и реакцијата од Орбан и Унгарија кои прифатија и санкции против Русија и бегалци од Украина, вели Љупчо Поповски.

-Унгарија добро памети како изгледа кога ќе ви влезе руската мечка во државата, а и самиот Орбан има протестирано за заминување на Русите од Унгарија, па е тешко веројатно дека тоа ќе го заборави и ќе остане индиферентен кон руската агресија врз Украина, вели Поповски.

Во врска со опасноста од нуклеарна реакција по прогласувањето на нуклеарна готовност од страна на Путин, Биљали вели дека диктаторите знаат да преземат и самоубиствени потезни.

-Диктаторите и тоталиристите сметаат дека и државата и народот се негови и таквата логика не треба да се потцени. Украина во 1994 година се денуклеаризира, вели Биљали.

Поповски додава дека Украина во тоа време сакаше да се ослободи од нуклеарното оружје оти никогаш не се знае кој може да го употреби, а освен тоа тоа беше еден од условите за постигнување независност на Украина.

-Претпоставувам дека 90 отсто од луѓето околу Путин се против интервенцијата, ама мора да му бидат потчинети. Тоа го видовме со шефот на Генералштабот и шефот на разузнавањето кои беа шокирани и од очите им се гледаше дека мислат оти Путин полудел, вели Биљали.

Биљали вели дека Западот работи на тоа Путин да падне од власт, а тоа би се случило само ако излезат Русите на улица и го симнат. Но, тоа повторно ќе создаде проблем оти ќе има нов конфликт.

-Јас очекувам да видам колкав ќе биде бројот на руски жртви во Украина. Оти за првите 24 часа Русија има повеќе жртви отколку за осум години во Сирија. Русија може да амортизира голем број жртви без политичка реакција, но прашање е колкав е тој број на толеранција. Сега руската воена машинерија не знае дали да продолжи со тенкови или да се префрли на ракетни напади, вели Поповски.

Целиот разговор погледнете го во видеото