Исмаил: Руските ешалони во Бугарија се виновни за бугарското вето кон Македонија
Демократските општества тешко учат, не влечат поуки од историјата и кога на крајот цената на нафтата ќе се покаже на бензинските пумпи, тогаш ќе видат дека нема шега. Сега сфатија дека наспроти себе имаат една структура која може да произведе неволји. А тие неволји што ги направи Путин не се од сега, вели за Утрински брифинг Ѓунер Исмаил.
-Путин задоцни неколку недели со својата акција која имаше погабаритни цели. Аналитичарите велат дека освојување на Киев и поделба на Украина на две му биле првите цели. Но, поради брзото вооружување на Украина, Путин задоцни и не успеа да ја подели Украина и да воспостави некаква квислиншка структура, па веројатно ќе се задоволат со двете отцепени области и Крим, вели Исмаил.
Руската армија не треба да се прецени ни да се потцени. Тие имаат планови за да си обезбедат простор, вели Исмаил.
-Путин покажа дека како што не учи западната цивилизација, така и тој ништо не научил од Брежњев. Парите од тогашната нафтена криза, Русија ги потроши на вооружување, а граѓаните од тоа не видоа ништо. По крахот на берзите руската нафта е под цена и компензираат со цената на гасот, вели Исмаил.
Освен лошите климатски услови, 150-илјадна војска и лош стандард на граѓаните не е нешто што би ги привлекло луѓето надвор од Русија кон неа ниту пак би ги привлекло другите земји кон Русија, смета Исмаил.
Руските ешалони во Бугарија се виновни за бугарското вето кон Македонија, вели Исмаил и додава дека идејата на овие ешалони е да ги држат општествата да бидат нестабилни. Транзицијата е простор во кој тој тип на ешалони, за кои Русите се мајстори, одлично успева во разнишување на сите темели.