Со Законот за обесштетување на жртви од трговија со луѓе, жртвата ќе добие сатисфакција од државата

Трговијата со луѓе спаѓа во високопрофитабилен криминал кој во време на кризи цвета. Сега пред пратениците ќе се најде Годишниот извештај на ЕК за капацитетот на институциите, каде што има и дел за човековите права и дел што се однесува на трговијата со луѓе. Македонија сѐ уште нема Закон за обесштетување на жртвите од оваа појава, но е во собраниска процедура.

-Нормално е во корпусот на заштита на човекови права да влезе и овој закон затоа што ова кривично дело е најфлагрантно кршење на човековите права. Во Извештајот се нотирани резултатите на Македонија со справувањето на трговијата со луѓе. Една од препораките е Македонија да донесе Закон за обесштетување на жртвите од трговија со луѓе со кој закон ќе се обесштетат сите жртви на кривични дела, вели Магдалена Несторовска, Национален координатор за борба против трговија со луѓе од МВР.

Несторовска вели дека ваков закон ја прикажува одговорноста на државата која прифаќа дека има појава на трговија со луѓе. Тоа обесштетување нема да ја збогати жртвата, но ќе и помогне да се лекува. Државата вели дека е виновна што не успеала да спречи трговија со луѓе поради што жртвата станала жртва.

Македонско здружение на млади правници им нуди бесплатна заштита на жртвите на трговија со луѓе.

-Подиректно сме вклучени во оваа проблематија од 2018 година и оттогаш сме постојано вклучени во работата на полицијата и Центрите за социјална работа. Добро е кога се работи мултифунционално, секој во своите надлежности, вели Ирена Здравковска, Македонско здружение на млади правници.

Таа додава дека жртвите сѐ повеќе се охрабруваат да кажат и да се пожалат, но дека многу е битна и превенцијата.

Македонија досега има донесено пет стратегии за заштита на жртви од трговија со луѓе, почувајќи од 2006 година. Несторовска вели дека секоја следна стратегија е надградба на претходната и постојано стратегијата се обидува да се носи со новите предизвици.

-Новата стратегија е многу богата и ги детектира областите каде што треба да се засили дејствувањето, но и ги дава податоците за досегашните успеси, вели Несторовска.

Таа додава дека стратегијата дава неколку стратешки правци како што е зајакнувањето на институционалната рамка. Здравковска пак додава дека треба да се работи и на системот за давање бесплатна правна помош која сега ја даваат здруженија на граѓани, но кога ќе дојде до судска постапка адвокат треба да обезбеди државата што сега не се прави.

Разговорот погледнете го во видеото