Андоновиќ: Германија ново жариште во Европа, Африка со загрижувачко ширење на коронавирусот

Реални предупредувања за сериозноста на ситуацијата со најава дека се очекува ескалирање на состојбата се упатуваат од светските државници. Песимистичките предупредувања на германската канцаларка Ангела Меркел која во своето телевизиско обраќање, прво по 14 години, дека во Германија заразата со коронавирусот може да опфати и до 70 проценти од вкупната германска популација, се чини дека полека се остварува, анализира новинарот Дејан Андоновиќ во „Утрински брифинг“ на „Слободна ТВ“.

Според податоците, бројот на заразени во оваа земја е 15,320. Од нив 2.993 се нови случаи, а успешно излекувани се 115 лица. Билансот на починати во земјата, според последните статистики, изнесува 44 пациенти. Со овие бројки Германија е на петото место, пред неа се само Шпанија, Италија, Иран и Кина.

Пробиена е и психолошката граница со бројот на починати од коронавирусот. Италија со вкупниот број од 3.405 жртви ја надмина и Кина каде од корона вирус починаа 3.245 лица.

Поради недостиг на медицински персонал се повеќе европски држави враќаат и лекари кои се во пензија. Шпанија која исто така е погодена од вирусот и на втора позиција во Европа по број на заразени и почиати, најави враќање на повеќе од 15.000 пензионирани лекари во редовна служба.

Особено загрижувачкo е и ширењето на коронавирусот во Африка, каде според СЗО, има „исклучително брз развој“ на пандемијата. Новиот коронавирус многу брзо се шири во Африка и се заканува континентот со население од 1,3 милијарди луѓе да го претвори во нов фронт против пандемијата. Практично во 35 од 54 држави е регистриран вирусот, податок што го руши првичното тврдење дека коронавирусот не е отпорен на високи температури.

Зголемување на бројот на заразени од ковид-19 има и во Србија каде изминатото деноноќие се регстрирани 16 нови случаи со што вкупната бројка изнесува 118 лица. Српската влада од синоќа целосно ги затвори границите на Србија, а воведе и полициски час со цел да го ограничи движењето на граќаните.

Американскиот претседател Доналд Трамп нареди затварање на границата на САД со Канада, со цел да се намали ширењето на коронавирусот. Трамп на прес-конференција за првпат јавно ја обвини Кина за појавата на вирусот, оценувајки дека светот плаќа „висока цена“ за иницијалната спорост со која Кина ги пренесуваше информациите за коронавирусот. Според него, сѐ ќе беше подобро доколку ги имавме информациите неколку месеци порано.

И се разбира во свој стил Трамп заклучи: „Борбата против коронавирусот е медицинска, а не финансиска“.