Андоновиќ: Нова криза во регионот – Република Српска расправа за антидејтонското делување на БиХ
Собранието на Република Српска на посебна седница во Бања Лука денеска расправа околу одлуката на Уставниот суд на БиХ да го одземе земјоделското земјиште на Република Српска и да го стави под управување на босанско-херцеговската федерација.
Оваа одлука Бања Лука ја оцени како против уставна и антидејтонска потсетувајќи дека доколку Сараево продолжи со кршење на дејтонскиот мировен договор од 1995 година ќе прогласи независност и ќе се обиде да се приклучи кон Србија.
Тензијата дополнително се зголеми откако членот на претседателството на БиХ, претставник на Србите и поранешен претседател на РС, Милорад Додик најави дека Босна следната година во ова време веќе нема да постои во овие граници. Овие изјави и оваа криза се прелеа и врз состанокот во Брисел каде престојуваше српскиот претседател Александар Вучиќ и кој беше повикан да објасни дали Белград ги поддржува овие најави и колку Белград воопшто стои зад овие изјави на властите во Бања Лука. Вучиќ во Брисел изјави дека иако сите очекувале од него да го укори Додик и претставниците на Република Српска, тој нема намера да се меша во натежните работи на Босна.
Тој во свој стил изјави дека го поддржува суверенитетот и интегритетот на БиХ, но и дека го поддржува интегритетот на Република Српска. На прашањето дали Белград би го поддржал отцепувањето на српскиот ентитет од Босна, тој одговори дека и Косово се смета за независна држава иако тоа не е.
Новите проблеми во Босна доаѓаат во исто време кога и траат политичките превирања во Косово, но и проблемите кои ги има српската православна црква со црногорските власти каде повеќе недели траат масовни протести на Србите низ црногорските градови. Оттаму се поставува и прашањето која е и дали воопшто Белград има некаква улога во сите овие случувања, бидејќи во сите три политички превирања стојат српските етнички партии, анализира новинарот Дејан Андоновиќ за Утрински брифинг на „Слободен печат“.
Србија во април оди на избори, па не се исклучува дека сите овие политички превирања се дел од политичката кампања која е актуелна за српските власти би можеле да ја вклучат во борбата за освојување на нов мандат.