Бечковиќ: Ќе ми остане голема тага што не го промовиравме последното ЦД на Зафир Хаџиманов

Пред се’, Зафир Хаџимнов беше голем човек, тој беше вистински мост помеѓу Македонија и Србија, вели Иван Бечковиќ, музички новинар и критичар, по веста за смртта на легендарниот пејач, музичар, композитор и актер.

„Иако Зафир Хаџиманов дипломираше на Факултетот за драмски уметности, како што самиот има кажано, музиката брзо го зела под свое. Неговата музичка кариера започна фестивалите каде освои многу награди. Настапуваше низ целиот свет Имаше настапи во Бољшој театарот во Москва, во Опера хаус во Сиднеј, а настапуваше и во париската „Олимпија“ и беше вистински претставник на македонската песна и македонската култура, не само во Србија, кадешто го помина својот животен век со нераскинливи врски кон Македонија, туку и во целиот свет. Затоа и тагата по Зафир Хаџманов е толку голема“, вели Бечковиќ за Утрински брифинг.

Тој вели дека последен пат се слушнал со Хаџиманов, речиси точно пред една година по повод излегувањето на ЦД изданието „Зафир пее, Македонија пее“ во издание на „Југотон Кроациа рекорд “ и тоа е римејк на неговиот албум од 1986 година, кој го објавил тогашниот „Југотон“, сега е возобновен и ставен на компакт диск.

„Тоа е капитално дело на Зафир Хаџиманов и нешто со кое тој најмногу се гордееше, се работи за негови композиции направени на легендарните македонски песни како што се „Ленка“, „Т’га за југ“, „Везилка“ од големите македонски мајстори на пишаниот збор: Конески, Петре М. Андреевски, браќата Миладиновци. Во 1986 година албумот го реализираше заедно со Славе Димитров, кој ги направи аранжманите. Ние се слушнавме во март, минатата година за да се договориме за промотивните активности, но пандемијата штотуку почнуваше и договорот беше да видиме како ќе се одвиваат работите затоа што времето не беше поволно за промоции. Ќе ми остане голема тага што не го промовиравме ова ЦД издание на Зафир, но неговото дело останува бесмртно, легендите не умираат, тие се вечни“, рече Бечковиќ.