Во Скопје секојдневно влегуваат околу 30.000 возила од источната и од западната страна

Центарот за управување и контрола на сообраќајот кој врши мониторинг на 92 семафори во градов и при тоа го регулира метежот, забележува дека секојдневно во Скопје влегуваат по околу 30.000 возила од источниот и западниот влез, рече денеска во Утрински брифинг, Иван Велевски, раководител на секторот сообраќај во ЈП „Улици и патишта“.

Анализите покажаа дека за разлика од претходниот режим на сообраќај, со фиксна контрола, метежот е намален за околу 30 проценти преку воведување на адаптивната контрола, која што не дозволува задушување на сообраќајот на главните правци. Тоа значи сообраќајот на главните правци се следи од нашиот центар и во зависност од потребата, односно метежот, семафорите добиваат друга контрола на управување на црвеното и зеленото светло. Приоритет му се дава на правецот кој е повеќе „задушен“ за да може да го расчисти метежот. Со тоа се намалуваат временските загуби и се забрзува протокот на возилата, објаснува Велевски.

Метежот во сообраќајот, од ЦУКС го објаснуваат со потребите на граѓаните кои се поврзани со централното градско подрачје.

Од источниот и западниот влез на Скопје секојдневно влегуваат и излегуваат околу 30.000 возила, додека во Големиот ринг на градот секојдневно транзитираат околу 100.000 возила. Метежот секое утро е по булеварите „Александар Македонски“ и „Гоце Делчев“, улица „Борис Трајковски“, и околу Транспортниот центар. Ние од тука правиме се што можеме за да се намали метежот, но за да нема нервозни возачи, им препорачувам на граѓаните да излегуваат порано од домовите ако сакаат да стигнат на време на работа, вели Велевски.

Центарот работи 24 часа, но со физичко присуство само до 22 часот, бидејќи како што објаснува нашиот соговорник во ноќните часови нема потреба од регулирање на сообраќајот. Камерите поставени на крстосниците не снимаат сообраќајни прекршоци, но и помагаат на полицијата во утврдување на прекршителот на сообраќајните правила при сторена сообраќајна несреќа.