Коцевска: Во нашата историја има големи празнини кога се работи за жените

Во НУБ „Св. Климент Охридски“ ќе се одржи промоција на публикација, конференција и изложба кои во фокус ги имаат жените во историјата и историографијата во периодот меѓу двете светски војни. Настаните се организирани од Центарот за истражување на национализмот и културата (ЦИНИК), а ќе се одржуваат утре (петок, 29 октомври), со почеток од 13 часот.

„Фокусот на ова издание на ЦИНИК е родовата перспектива, онаа женска историја за која можеме да најдеме примери во нашето секојдневие, бидејќи и во академските кругови за оваа тема поретко се пишува и затоа оваа година го работевме овој проект поддржан од министерството за култура, Градот Скопје и Фондацијата „Хајнрих Бел“ од што произлезе публикацијата „Архиви на невидливите: Жените од македонското минато во печатот помеѓу двете светски војни“, која нуди авторски текстови и систематизирана библиографија за појавноста и видливоста на жените во печатените медиуми од меѓувоениот период, кога се активни жените во општествениот живот, секогаш биле, но сега навистина го гледаме тоа од изворите. За жал, многу малку е разгледувана женската перспектива, особено во овој период и тоа беше мотив за ова што го работиме. Втора работа е што кај нас многу ретко се анализирал печатот. Конкретно во тој период немало женски или пак феминистички списанија, како што тоа било во другите земји од регионт, во државите од поранешна Југославија, како што било списанието „Женски покрет“ во Србија. Сакаме како историчари и луѓе што се занимаваат со хуманистика да обрнеме внимание на тие извори како што е печатот, ко што во тој период билмногу важна еманципаторска алатка. Тоа бил период кога започнува индустриското општество, жените се информирале од печатот и тој бил изклучително важен за нивната еманципација“, вели за Утрински бригинг, Јана Коцевска, една од уредничките на зборникот.

Публикацијата е изготвена од осум истражувачи и истражувачки, односно Нада Бошковска, професорка на Катедрата за источноевропска историја на Универзитетот во Цирих, Здравко Стојкоски, Ивана Хаџиевска, Мања Величковска и Фросина Крушкаровска, Марина Мијаковска, Јана Коцевска, и Билјана Котевска. Уреднички на публикацијата се Ивана Хаџиевска и Јана Коцевска.

По промоцијата, утре ќе се одржи конференција на тема „Регионални искуства на архивирање и изучување на историјата на жените во печатената култура – патишта на зачувување и споделување“ на која учество ќе земат Нада Бошковска – професорка на Катедрата за источноевропска историја на Универзитетот во Цирих, Ана Колариќ – доцентка на Катедрата за општа и компаративна книжевност и теорија на книжевност на Филолошкиот факултет при Универзитетот во Белград, Ивана Пантелиќ – научна соработничка во Институтот за современа историја во Белград и Манца Г. Ренко – асистентка на Факултетот за хуманистички науки на Универзитетот во Љубљана. Модераторка на конференцијата е Ана Василева.

Во текот на целиот ден во петок на 29 октомври во НУБ присутните ќе имаат можност да ја погледнат и изложбата на визуелната уметница Христина Иваноска на тема „Музеј на женски приказни“ започната во 2015 година.