Марија Савовска: Жените треба да стекнат доверба во себе и во институцииите за да се застапуваат за своите потреби

Жените во руралните средини се исклучени од граѓанското учество, економското учество, а соочени се и со социјална изолација. Тие се во фокусот на Акција Здруженска, која развива програми специјализирани за жените самите да ги надминат бариерите и недовербата кон институциите и самите да ги застапуваат своите потреби.

„Работиме во 33 села во државата во еден процес за зајакнување на жените за да тие самите ги артикулираат своите потреби. Кои се жените во селата?

Тоа се жени кои се над 50 годишна возраст, со средно или основно образование, невработени или пензионерки, вообичаено живеат со партнер и немаат деца под 10-годишна возраст. Она со што тие се соочуваат е недостаток на услови за елементарни секојдневни потреби. Тие немаат превоз или е прескап и им треба 400 денари за да стигнат до град, на пример на пазар или на лекар. Второ, голем дел села се без канализација и со проблеми со водоснабдувањето. Тоа се проблеми на сите граѓани, но отсуството на овие услуги се прекршува врз грбот на жените, бидејќи од нив се очекува да го одржуваат домаќинството.

Исто така, недостасуваат социјалните услуги како грижа за постарите лица или децата со посебни потреби“, вели за Утрински брифинг, Марија Савовска од Акција Здруженска. Оваа организација заедно со своите локални партнерски организации ги идентификува жени кои се потенцијални лидерки во заедницата кои во својата средина работат на артикулирање на заедничките проблеми и потреби, како и решенија за тие проблеми.

„Клучно во овој процес е жените самите да ги преговараат овие потреби наместо некој да зборва во нивно име. Притоа многу е важно низ овој процес тие да ја надминат недовербата и во инстиуциите но и во самите себе, бидејќи слабиот интерес на жените во најголем број случаи се должи во недовербата дека тие можат нешто да направат по прашање на околностите во кои живеат“, вели Савовска.