Се отвора мини зоолошка градина во ветеринарното училиште “Браќа Миладиновци”

Несекојдневната идеја да се создаде мини зоолошка градина во дворот на средното ветеринарно и земјоделско училиште „Браќа Миладиновци“ конечно дојде до реализација. Иако оваа зоолошка градинка со околу педесетина животни функционира веќе неколку години и е исклучиво наменета за практичната работа на учениците, утре истата ќе биде свечено отворена за посетители. Влезот ќе биде слободен, односно ќе може да се влезе со доброволен прилог. Директорката на училиштето, Елизабета Ангелеска во разговор за Утрински брифинг вели дека во паркот креирана е и забавна и едукативна содржина за сите посетители.

– Ние сме единствено училиште во земјава кое има сопствена зоолошка градина, која сега ќе стане достапна за посетители. Во моментов има дваесетина видови на животни или околу 50 единки. Од зоолошката градина од Словенија, поточно од Словенске коњице добивме носести мечиња. Оваа зоолошка градина беше инспирација за нас, а идејата е на група ентузијасти кои тука предаваат стручни и теоретски предмети. Зоолошката градина функционира од 2015 година но за потребите на училишето. Од утре градината со збогатени содржини ќе биде отворена и за јавноста. Граѓаните ќе можат да ја посетат во работно време, а влезот е слободен, односно со донирање на симболична сума, секој ќе може да влезе, објаснува директорката на училиштето. Во ЗОО Паркот се сместени триесетина домашни и светски животни: лами, носести мечиња, пони коњчиња, елени, срни, домашни животни, како и многу птици, а директорката на училишето нагласува дека за  животните  се грижат учениците под менторство  на професорите кои предаваат ветеринарна и сточарска група на предмети.  Но за жал во изминатите десетина години ветеринарната струка е ставена на маргините, а интересот кај учениците за упис во ова училиште е со помал.

– Учениците, поточно нивните родители не сакаат децата да се занимаваат со земјоделство, ветеринарство или со одгледување на домашни животни затоа што земјоделството во минатото беше трудоинтензивна работа, меѓутоа  модерното земјоделство е многу поразлично. Од друга страна придобивките од запишувањето во средно стручно образование се многу поголеми во споредба со гимназиското образование. Учениците веднаш по матурирањето можат да излезат на пазарот на трудот, или да започнат свој бизнис, но доколку полагаат државна матура, можат да се запишат и на факултет, објаснува Ангелеска. Во рамки на училишето функционира и аквапоника во која се одгледуваат риби и растенија во симбиоза, а исто така има и зачинска  и зеленчукова градина.