Симовски: Се очекува пад на БОП, индустриското производство и домашната потрошувачка како и пораст на невработеноста
За очекување е пад на БДП, намалување на индустриското производство и пад на вработеноста. Платите ќе бидат намалени, животниот стандард ќе падне…тоа е нормално да се очекува. Прашањето е колку ќе трае тоа. Ако трае само во вториот квартал тоа е добро, ако трае и во третиот ќе биде проблем бидејќи тогаш би влегле во рецесија.
Ова го потенцираше денеска во Утрински брифинг Апостол Симовски, директор на Државниот завод за статистика.
Симовски се осврна на неколку прашања поврзани со статистиката во време на вонредна ситуација во бробата против Ковид 19, а дел од одговорите беа насочени кон состојбата со вработеноста и невработеноста.
„Има разлика меѓу она што Агенцијата за вработување и ние го го презентираме како податок за пазарот на трудот. Агенцијата ја следи само формалната вработеност/невработеност. За жал државата се уште ја има сивата економија каде што луѓе се ангажирани работно но не се регистрирани. Затоа Заводот за статистика ја прави анкетата за работната сила. Оттука се разликуваат и податоците. За првиот квартал, нема да има проблем да се собират податоците и да се соопштат. За вториот исто нема да биде проблем но ќе има задоцнување“, рече Симовски образлжувајќи дека поради карантините, не се прават теренски анкети клучни за прибирање на некои податоци, меѓу кои и состојбата со работната сила.
Симовски рече дека податоците од првите два месеца уажуваат дека прогресот од минатата година продолжил и во 2020, но од март, кога престана нормалното функционирање на економијата, први настрадаа угостителството и туризмот а од ден на ден и сите останати гранки каде е стопирано производството.
„Очекувам да има одреден пад, со тоа што кај вработеноста/невработеноста првите два месеца добро функционираа, така што очекувам и да не биде негативен резултатот. Најголемиот дел од фирмите кои престанаа да функцинираат, своите вработени ги ставија на годишен одмор. Во мал обем се отпуштањата од работа. Со анкетата за работната сила може да има некаква разлика кај лица кои работеле во сивата економија. Не очекувам значаен пад на стапката на вработеност/невработеност. Ќе паднат платите и приходите сигурно. И да биде утре се во нормала, на субјектите ќе им треба време да ги обноват врските, затоа ќе има пад на приходите“, посочи Симовски.
Тој вели засега проблем на статистичарите им се теренските анкети кои се спроведуваат во домаќинстватa: анкетата за работната сила, за потрошувачката, за живеењето и уште неколку кои поради Ковид 19 се стопирани.
„Се соочуваме со проблем со анкета за потрошувачката која не можеме да ја спроведиме во моментов. Таа е подетална анкета во која се следи секој трошок и приход во домаќинствата и врз основа на неколку индикатори се следи животниот стандард. Од март месец наваму не знаеме како ќе го собереме овој податок. На пример анкетата за работна сила може да се направи, но што сте потрошиле вчера, тешко дека ќе знаеме. Се обидуваме да најдеме алтернативни извори на информации но засега имаме одредени проблеми. Овој податок е важен бидејќи влегува како главен инпут во пресметката на БДП. Ова е проблем на сите заводи, не само нашиот“, потенцираше првиот човек на Статисика.
Демографските статистики за населението пак, инфомираше Симовски, се одвиваат непречено преку административните податоци кои се обезбедуваат од институциите.