??Синадиновска: Појава на неетичко и непрофесионално известување околу пандемијата – море од непроверени информации полни со сензационализам

Советот за етика во медиумите (СЕММ) продолжува да реагира на зачестените случаи на неетичко и непрофесионално известување, а особено на ширењето шпекулации кај одредени медиуми во врска со пандемијата на коронавирусот. Едностраното и шпекулативното известување во вакви услови може дополнително да ја зголеми вознемиреноста и паниката и да поттикне нерационално однесување од страна на граѓаните.

Прекршување на членот 1 од Кодексот на новинарите, кој се однесува на објавувањето точни и проверени информации е утврдено во 39% од пријавените случаи, додека прекршување на членот 8 од Кодексот на новинарите, односно сензационалистичко информирање е утврдено во 35% од пријавените случаи. Ова е она што може да предизвика паника кај граѓаните. Имате море од информации непроверени а полни со сензационализам, изјави за Утрински брифинг Катарина Синадиновска, претседателка на управниот одбор на Советот за етика во медиумите.

-Јавноста реагира и на обидите за политизирање на кризата околу коронавирусот во медиумите, а во дел од пријавените случаи до СЕММ утврдено е дека новинарите не обезбедуваат професионална дистанца од политичките субјекти, односно се прекршува член 14 од Кодексот на новинари (32%). Медиумите не смеат да бидат искористувани за поделба на луѓето преку различни политички пресметки, а коронавирусот не смее да биде „оружјето“ што ќе се користи од кои било политичари, без разлика дали станува збор за власт или опозиција, за политичко поентирање, вели Синадиновска.

За Синадиновска, позитивна практика е што се зголемува бројот на случаи решени низ медијација, и „подготвеноста на медиумите да се коригираат кога ќе се утврди пропуст во содржината“.