Спасовски: Миграцијата, тероризмот и сајберкриминалот постојат и ќе останат, но не нѐ загрозуваат

Од буџетот на Министерството за внатрешни работи реновиран е објектот на познатата „шеста управа“ која се грижи за безбедноста на државните функционери и лица од важност, вели за Утрински брифинг Оливер Спасовски, министер за внатрешни работи во Владата на РС Македонија.

-Во рамки на министерството трошоците се трудиме да ги сведеме на минимум но она што мора да се направи се прави, како што се реконструкција на 72 полициски објекти кои сега се енергетски ефикасни. Возниот парк на МВР не е во добра кондиција, имавме план за набавка на возила за оперативно работење, но Владата донесе рестриктивни мерки, па за почнување на процедура за набавка на вакви возила ќе мора прво да се дискутира на седница на Влада. Производителите на возила имаат потешкотии во ова време на криза, па прашање е и дали ќе успееме да дојдеме до нормална цена, вели Спасовски.

Спасовски додава дека тој користи приватен телефон и не користи службена платежна картичка.

Во однос на безбедноста, Спасовски вели дека координирано се работи со АНБ со цел да се сочува безбеднста во државата.

-На овие простори постојат низа предизвици. Имаме добра геостратешка позиција, ама и предизвикува и големи проблеми. Ние сме коридор, тоа се виде со мигрантската криза, па потоа борбата со тероризмот и слично па битно е службите да бидат будни, вели Спасовски.

Тој додава дека нема индикации за работи кои можат да ја загрозат безбедноста во државата. На безбедносен план миграцијата, тероризмот и сајберкриминалот постојат и ќе останат.

-Во однос на миграција податоците се следниве. Мигрантските токови од 2015 и 2016 година се намалени за половина како и илегалните преминувања. Има тренд дравјани на Куба кои го користат безвизниот режим со Србија па илегално заминуваат за Грција. Украинската криза дава некоја нова димензија на бегалци од вооружен конфликт. Ние не сме на првата линија, но сѐ ќе зависи колку долго ќе трае оваа криза и од капацитетот на соседните земји да ги прифатат овие луѓе кои бегаат од руската агресија. Засег имаме околу 50 лица кои се дојдени од Украина во приватна реија, кај пријатели и тука државата немало потреба да реагира. Владата сепак се подготвува и за позначителна бројка, вели Спасовски.

Дали Македонија е подготвена за сајбер напади и информативна војна бидејќи Македонија е цел на Русија како непријателска земја, како што рече и рускиот амбасадор, Спасовски вели дека многу малку време и енергија се искористи во изминатиот период за сајбер нападите.

-Со државите партнери со кои соработуваме малку време се посветуваше на сајбер нападите. Сега веќе се дискутира и сите сериозно гледаат на овие напади на кои и ние бевме изложени со напади на неколку државни органи. Одделот на компјутерски криминал на МВР на ниво на техника и кадри се унапредува и вложувавме во човечкиот потенцијал. Во делот на ИТ тешко се задржуваат луѓето тука. Мислам дека во делот на институциите и стопанството од сајбер напади имаме голем напредок. Обидите за напад на МОН и слично беа успешно спречени, вели Спасовски.

Еден од полициските синдикати жестоко го критикува МВР и Владата за платите и се најавуваат штрајкови.

-Не сакам да навлегувам во мѓусиндикалните битки на полициските синдикати. Јас сум за да се седне и разговара за проблемите, но не може да бараме проблем онаму каде што го нема. Сите службеници во МВР имаат исполнет услов за минимална плата. Платите постојано растат, а сум подготвен да разговараме за зголемување. Ако секоја година полицајците добиваат бонус плата, дневници кои претходно ги немаше а се зголемени на 2.000 денари, тоа не е лошо. Но, колку и да е голема платата подобро е да бде поголема, ама за тоа треба да имаме можности. Мораме да го вратиме чувството на припадност кон институциите и фирмите оти тоа е многу битно, вели Спасовски.

Опозицијата обвинува дека секој што ќе влезе во политиката влегува за да стане милионер. Јас не сум и нема да бидам милионер, вели Спасовски, но знам политичари кои немаа ништо па сег имаат неколку хидроцентрали, возила и слично.

-Во однос на борбата против корупцијата, тоа е битка што се води на два фронта. Едно е ефикасност во борба против корупција, а друго е перцепцијата за корупцијата во земјата. Многу важен проблем е да се направи политички напор да се смени перцепцијата кај луѓето. Што се однесува до откривачката дејност, МВР работи континуирано и за една година за 50 отсто се зголемил бројот на откриени случаи за поткуп. Битката против корупцијата е континуирана, вели Спасовски.

Високото раководство од СДСМ се обидуваше да постигне високи партиски цели, а понискиот ешалон се возеше на нивната работа. Затоа резултатот од локалните избори беше таков.

-Јас искрено се надевам дека ќе се сменат и пониските ешалони и дека на терен ќе се случат промени за да се поттикне искрено борење за исти вредности на сите нивоа во партијата. Исто така треба да се работи на коалицискиот потенцијал на СДСМ која може да ги обедини сите проевропски сили, вели Спасовски кој не е член на сегашното партиско раководство.

Спасовски вели дека стабилноста на коалицијата меѓу СДСМ и ДУИ не се чува со заштитување на припадници на ДУИ од прогон за корупција.