Фрчкоски: Лажна е правната дилема дека не може распуштено Собрание да се свика

Прашањето кое се отвора е исто така мандатот на пратениците, односно повторно да се свика Собранието, да прогласи вонредна состојба. Може да го земеме примерот на шпанскиот Сенат, кој вчера го изгласа протоколот за влез на Северна Македонија во НАТО, изјави професорот Фрчкоски.

Според Фрчкоски дефинитивната одлука да не се оди на избори мора да се реализира.

-Тоа се прави единствен начин, а тоа е преку Собранието. Лажна е правната дилема дека не може распуштено Собрание да се свика. Пратениците се во мандат до изборот на други пратеници, а Собранието е во постојано заседание. Значи може да се одложат изборите и да се прогласи вонредна состојба. Не може да се каже за кога точно би биле одложени изборите. Големи се шансите да се оди на редовни избори на есен, вели Фрчкоски.

Околу траењето на техничката влада и евентуалното враќање на политичка влада, Фрчкоски смета дека тоа не одговара на никому и не очекува ваков потег во иднина.