Академик Фити: Политичката битка ЕУ-Русија се води преку енергетиката

Политичко економска анализа на овој момент со кризата во Украина за Утрински брифинг денес изнесе академик Таки Фити.

-Кога почна ковид кризата цената на енергентите многу се намали затоа што падна производството, а кога економската активност е слаба паѓаат цените на енергенците. Но, дојде до заздравување на економијата. Сега е извесно дека глобалниот економски раст ќе биде 5,5 отсто што значи многу брзо опоравување, коментира академик Фити.

Тој вели дека природниот гас за неполна година порасна за 450 отсто што е страшен шок. Како резултат на порастот на природниот гас дојде до пораст на другите цени. Сега расте и цената на нафтата, но брзо порасна и светската цена на јагленот. Иако светот го напушта јагленот, па дури и во Кина се напушта јагленот бидејќи оданочувањето на производство со јаглен е високо.

-Најголеми стравувања се дека оваа криза со Украина ќе предизвика нови турбуленции со зголемувањето на цената на енергенсите, иако главен извор на пораст на цените е економската активност. Зелената енергија е сѐ уште скапа, но перманентно се развива. Има еден геополитички фактор во врска со гасот кој беше запоставен, а тоа е улогата на Русија. Кога дојде до огромно зголемување на цената на гасот, Кина побара зголемување на испораката на гас од Русија, а Русија ја намали испораката за Западна Европа што нема економска логига при тие високи цени но има политичка логика, вели Фити.

Германија е економски џин но нема извори на енергија и зависи од увоз на енергија. Сега Германија зазеде цврст став дека нема да го пуштат Северен поток 2 и по цена ситуацијата да биде тешка.

-Путин знае дека најголем адут му е енергетиката. Дури 45 отсто од гасот во Европа доаѓа од Русија. Малку испорачуваат Велика Британија, Норвешка и Алжир, вели Фити.

Тој додава дека најзначајниот дел од руските приходи се поврзани со извозот на гасот.