Александар Прокопиев: На писателите им треба слобода, не кланови и поделби

Писателот Александар Прокопиев во Утрински брифинг на Слободен печат зборуваше за својата најнова книга „222 антиупатства за лична употреба (1978-2018)“, во издание на „Авантпрес“ од Скопје, што е негов своевиден животен проект.

„Она што ги обединува сите овие записи е миговноста на создавањето. Напишани се најдолго за еден ден, кога се работи за есеите или расказите, а најчесто се напишани за час или два.

Сакав да ја задржам нивната непосредност. Почнав да ги пишувам кога бев многу млад, пред 40-тина години и кога сега ги гледам – многу често тие се импресии на мигот. Од првите кога сум бил многу жесток и манифестен, но како поминувале годините тие добиваат и еден мемоарски тон“.

Прокопиев вели дека има хиперпродукција во македонската книжевност, како и поделеност меѓу писателите.

„Меѓу писателите постои поделба, да не речам една клановска поделеност, затоа ние, 15-тина писатели пред 20 години го формиравме Друштвото на независните писатели, токму заради таа клановска присилност и насилство кое се врши едни меѓу други, кадешто книжевните вредности стануваат неважни.

А македонската култура постојано произведува интересни луѓе.

Еве и „Медена земја“ и „Фолтин“ и 150 други таленти- за нив најважна е слободата. Не да ги собираш во групации“, рече Прокопиев