Ана Франговска: И во уметноста главна тема станува екологијата затоа што состојбата е алармантна
Изложбата „Допир“, која до 15 октомври ќе биде поставена во Мала станица е дел од проектот „Ние сме тука: идни екологии“, соработка на Националната галерија на РСМ во партнерство со Британскиот совет и британската агенцијаза подвижни слики „Лукс“. Покрај делата на британските автори: Уриел Орлоу, Шарлот Проџер, Луис Хендерсон и Бен Риверс, како и делото од колекцијата на Британскиот совет на Бедвир Вилијамс, од македонска страна учествуваат уметниците Елпида Хаџи Василева, Кристина Пулејкова и Велимир Жерновски.
„Иако насловот на изложбата гласи „Допирот“, кој звучи прилично поетично и лирично особено во овој пандемиски период во кој што сите сме страдни за човечки допир, топлина и блискост, за жал повторно зборуваме за онаа темна страна на допирот. Тоа е оној смртоносен допир на човекот со кој свесно или несвесно ја уништува животната средина, ресурсите на планетата. Она што е специфично и интересно за овој проект е дека е повеќеслоен и мултидимензионален и не се занимава само со онаа базична линија на екологијата – зелени површини, загадување на воздухот и на водата итн, туку зборуваме за проблемите, причините, состојби и за сите последици со кои што се соочуваме и целта е да влијаеме врз подигнувањето на свеста на пошироката публика за тоа дека политиката влијае врз развојот на екологијата, дека во овој контекст можеме да зборуваме за миграции, историја, за архивирање, за колонизацијата и надмоќта на посилните врз помалку развиените народи. Потоа во овие проблематики мое да се зборува за медицинската индустрија, за замирање на традиционалните начини на собирање растенија, за нивната злоупотреба од страна на медицинската индустрија“, вели за Утрински брифинг, Ана Франговска, куратор на изложбата.
Инаку на оваа изложба македонската публика има можност прв пат да го види делото на на авторката Елпида Хаџи Василева, насловено „Silentio Pathologia“ со кое ја претставуваше Македонија на 55. Венециското биенале во 2013 година. Делото се осврнува на движењето, миграцијата и влијанието на средновековните чуми во Европа и ја разгледува современата загриженост за меѓународните миграциски болести, каква што е Ковид-19. Ова амбициозно дело вклучува ткаена свила, кожурци од свилена буба, кожи од стаорци и завеси од челичен лим.
Франговска додава дека има голем интерес од публиката за оваа изложба и особено од учениците од средните училишта.