Ана Јовковска: „Булимичното читање“ на социјалните мрежи ги изеде книгите
„Сакам значи постојам“ е третата по ред книга на Ана Јовковска, која ќе биде промовирана во среда (5 февруари).
Таа вели дека нејзината нова книга е сосема различна од претходните:
„Овие триста страни на книгата што е во издание на издавачката куќа „Три“ е прилично натопена со интимните животни предизвици со мастилото на љубовта и со она што сите не’ обременува во денешнава мелница“.
Таа зборуваше и за социјалните мрежи за кои вели дека предизвикуваат „булимично читање“.
„Најкратко речено, булимично читање е она што прави сите содржини што ги примаме да ги преџвакуваме. И потоа да му ги повратиме на светот во лице.
Новинарите, јавните личности, писателите имаат можност нешто да променат“, вели Јовковска.
Прочитајте – „Скопје за почетници, добро упатени и понављачи”
САКАМ во себе содржи цел еден друг свет на МОЖАМ! Тоа e оној внатрешен импулс на проактивност за подобрата ЈАС, подобар живот, подобар свет.
Се движам по тркалото на животот… Застанувам само пред сопките на љубовта, болката, слободата, емпатијата, родителството, дискриминацијата, егото и интегритетот. Сепак… се движам бунтовно и храбро кон неправдата во светот, сиромаштијата на духот, човековите судбини и човековите права, женската слобода, консумеризмот, технолошкото ропство, културата на шопинг-центри, проституцијата на уметноста, но и проституцијата на духот. И така, качена на велосипедот на животот, го барам ѕвончето со кое ќе свирнам за ПРОМЕНА! Некогаш тивко, некогаш гласно, но секогаш со верба дека овој комплициран свет може да се спаси со добрина и љубов.
По трнливиот пат на мудроста, не знам дали успеав да ги „фатам“ состојбите на невралгичните премрежја на нашето време и на нашите души, но се обидов. Она што ми беше неочекувано во целиот процес е што сфатив дека да се биде набљудувач на најчовечкото во себе е уште потешко отколку да се биде набљудувач на времето и светот.
САКАМ, ЗНАЧИ ПОСТОЈАМ е духовно патување од и кон себеси. Качи се на тркалото на животот!