Ангелов: Нема опасност по здравјето на тетовчани по пожарот, Армијата со опрема од САД го мереше квалитетот на воздухот

Во Тетово гореше фабрика за производство на пластика, лакови и бои, а пожар со толкав обем немало одамна. Вчера градот Тетово беше обвиен со чад и кај граѓаните се појави страв дека станува збор за испарувања опасни по здравјето. За тоа како се гаснеше пожарот во фабриката во Утрински брифинг разговаравме со директорот на ЦУК Стојанче Ангелов.

-Наместо да правиме проценка, дојде тим од АРСМ со опрема која е донација од САД и извршија мерење. Чад имаше, но немаше отровни материи. Нивната опрема може да детектира отровни испарувања. Граѓаните треба да бидат спокојни, нема никаква опасност по нивното здравје, вели Стојанче Ангелов, директор на ЦУК за Утрински брифинг.

Тој информира дека фабриката не е целосно изгорена, туку само нејзини делови, а долготрајноста на пожарот се должи на составот на материјалите кои биле во погоните и магацините. Тоа се материјали кои кога еднаш ќе се запалат горат долготрајно и тешко се гаснат.

-Хеликоптери обезбедивме, а вчера за првпат беше вклучен хеликоптер на МВР со обучена посада за гаснење пожари, вели Ангелов кој рече и дека во конкретниот случај гаснење со хеликоптери немало да помогне оти пожарот се случувал во затворени простории.

Во гаснењето учествуваа тетовските пожарникари, но се приклучија и екипи од Скопје кои се искусни за гаснење вакви пожари. -Беше користена пена за гаснење, а кога се потроши беше побарано пена од скопскиот аеродром, од ТАВ. Ако се гаснеше само со вода можеше да дојде до експлозија и тоа ќе беше навистина опасна и трагична ситуација, вели Ангелов за Утрински брифинг.

Целиот разговор погледнете го во видеото