Андоновиќ: Во стилот на Пуџдемон и Борис Џонсон, Додик најавува РС-егзит
Додик во стилот на Карлос Пуџдемон и Борис Џонсон сака српскиот ентитет од Босна да го отцепи овојпат без референдум туку како резултат на, како што вели, обесправеност на Србите во федерацијата, вели новинарот Дејан Андоновиќ за Утрински брифинг на „Слободна ТВ“.
Нова политичка криза во Босна, откако босанските Срби се закануваат со напуштање на БиХ доколку не успеат во барањето да се исфрлат странските судии од највисокиот суд во земјата.
Српскиот член на претседателството на БиХ и поранешен претседател на Република Српска, Милорад Додик се обрати пред пратениците во Бања Лука на англиски со зборовите: „Goodbye BiH, welcome RS exit“ (Довидување БиХ, добредојде РС-егзит) јасно алудирајќи на излезот на Велика Британија од ЕУ и поисоветување на состојбата во БиХ.
Република Српска обвинува дека Уставниот суд на БиХ станал политички инструмент на Бакир Изетбеговиќ и босанските муслимани поради што Додик има право да и каже збогум на Босна.
Со одземањето на земјоделскиот имот, Сараево сака да ги одземе ентитетските надлежности на РС предвидени во дејтонскиот договор од 1995 година. Додик му порача на српскиот народ дека е измамен и дека српскиот ентитет во Босна веќе нема никакви шанси за опстанок. Оттаму му даде рок од 60 дена да се преиспитаат одлуките на уставниот суд во спротивно српскиот ентитет ќе ја напушти федерацијата.
Инаку овие повици на Додик го ставаат во неповолна позиција бидејќи е актуелен член на претседателството на БиХ, а ја брани Република Српска од институцијата која треба да ја заштити уставноста и законитоста на федерацијата.
Додик во стилот на Карлос Пуџдемон и Борис Џонсон сака српскиот ентитет од Босна да го отцепи овојпат без референдум туку како резултат на, како што вели, обесправеност на Србите во федерацијата, вели новинарот Дејан Андоновиќ за Утрински брифинг на „Слободна ТВ“.
Ова ќе биде голем тест и за меѓународната заедница која туку што ја смири косовската тензија со обид да ги врати на преговарачка маса Белград и Приштина. Сега, замрзнатиот конфликт во Република Српска повторно се активира, во исто време кога траат и тензиите во Црна Гора на релација Српска Црква – Влада во Подгорица, која исто така како и во РС има скриена поддршка од Белград.
Влогот на меѓународната заедница е голем ако се земе во предвид дека Бања Лука и самиот Додик имаат блиски врски со Москва и Владимир Путин. Западните сојузници одамна во Република Српска и Додик гледаат упориште на Балканот за руските интереси и руската геостратегија, анализира Андоновиќ.