Андоновиќ: Песимистички прогнози на САД и Европа – вирусот се уште не го достигнал пикот и допрва ќе се шири

Повеќе од 1,5 милиони заразени со коронавирус во светот, и 88.505 починати е денешниот најнов биланс на последиците од пандемијата на Ковид -19.

Најголем број на заразени се регистрирани во САД 435.128 лица, следува Шпанија со 148.220, и Италија 139.422 заболени. Од азијските држави најмногу има заболени во Кина со 81.865 инфицирани, а од блиско источните држави најтешка е состојбата во Иран каде се заразени 64.586 лица.

Епицентарот на коронавирусот во светот и натаму се САД, каде втор ден по ред, се пријавени околу 2.000 смртни случаи поврзани со новиот коронавирус. Вкупно смртните случаи во САД се 14.695. Така, САД ја надминуваат Шпанија, каде има 14.555 починати, но останува приближно на ниво на Италија – 17.669.

Федералните власти најавија дека ќе ги конфискуваат американските медицински производи за извоз се додека не се утврди дали на земјата и се потребни за време на борбата против коронавирусот.

Според соопштение од Царинската и граничната контрола на САД и Федералната агенција за управување со вонредни состојби, државата ќе го прекине извозот на респиратори, маски и хируршки ракавици.

Федералната агенција за управување со вонредни состојби е одговорна да процени дали наведената опрема е неопходна во САД, дали американската Влада е приоритетен купувач или стоката може да се извезува.

Минатиот петок, претседателот Трамп издаде упатство со кое бара федералните служби да ги преземат сите неопходни мерки и да ја задржат медицинската опрема доколку е потребно за американските корисници

Во меѓувреме американскиот претседател Доналд Трамп најави дека ќе ја рестартира американската економија, но дека претходно е потребно да се намали стапката на смртност од коронавирусот.

Трамп објави дека Центарот за контрола на заразни болести ќе издаде упатства што ќе им овозможат на работниците во клучните инфраструктурни проекти, кои оздравеле од вирусната инфекција, да продолжат да ги вршат своите работи.

Американски научници во меѓувреме испратија писмо до Белата куќа во кое се тврди дека коронавирусот нема да исчезне при пристигнувањето на потоплите временски услови. Се наведува и дека во САД има ризик за втор бран на епидемијата. Песимистичките прогнози се базираат од една студија во Кина која покажала дека вирусот се шири експоненцијално дури и во услови на максимална температура. Секое заразено лице го распространува во просек на две други лица, се вели во оваа студија.

Песимистички прогнози за запирање на пандемијата имаат и Европјаните, чиј европски центар за контрола и превенција на болести најавува дека Европа се уште не го достигна врвот на епидемијата, и дека пикот на заразата допрва доаѓа.

Сите овие информации и предвидувања го загрижуваат светот кој се уште не излегол од здравствената , а веќе му се навестува економско социјална криза. Светската банка и ММФ предупредуваат дека пандемијата предизвикана од коронавирусот ќе однесе во сиромаштија околу половина милијарда луѓе во светот, со оглед на намалените приходи на домаќинствата или намалената потрошувачка.

За прв пат од почетокот на пандемијата, Советот за безбедност на Обединетите нации најави состанок на кој ќе се расправа за пандемијата на коронавирусот. Најмоќното тело на ОН е критикувано за непреземање мерки против глобалната криза што ја предизвикува болеста ковид-19. Советот во минатото се занимаваше со итните случаи во јавното здравство како ХИВ-от и еболата. Генералното собрание на ОН на 2 април едногласно усвои резолуција во која се признаваат „невидените ефекти“ на пандемијата и повика на „интензивна меѓународна соработка во борба, ублажување и поразување“ на болеста ковид-19.