? ?Арсовски: Рејтинзите партиите да ги остават на страна – во моментов на државата Македонија и се потребни избори
Прашање на здравствените експерти е да кажат кога е безбедно да се оди на избори, но јас претпочитам тоа да се направи во првата можна прилика кога епидемиолошката состојба ќе го дозволува тоа, изјави за Утрински брифинг, политичкиот аналитичар, Петар Арсовски, кој додава дека Македонија се соочува со една „двојна компликација“.
-Собранието како Законодавен дом и Владата како извршна власт се соочуваат со една од најголемите кризи во историјата на Македонија – имаат намален мандат, а со тоа и намален кредибилитет и капацитет да се справуваат со неа. Во овој момент се соочуваме со хендикепирани институции кои треба да се справуваат со кризата. Едно од овие „гајлиња“ треба да тргнеме што е можно побрзо. Веднаш кога ќе се обезбедат услови треба да се оди на избори, вели Арсовски.
Околу некои информации дека Пендаровски може само еднаш да прогласи вонредна состојба, Арсовски вели дека Уставот му овозможува на Претседателот на Републиката да прогласи вонредна состојба онолку пати колку што тоа го налага ситуацијата.
Поврзаноста на датумот за избори со партиските калкулации и нивниот рејтинг
-Не постои идеален термин. Секоја партија има калкулации кога изборите повеќе им одговораат. И тоа е така во последниве 20 години. Во моментов поважно прашање е кога и се потребни избори на државата. Ние не знаеме што може да не очекува во септември. Што доколку не зафати нов пик и да не можеме да организираме избори подолг период? Затоа сметам дека почетокот на летото е соодветен термин, изјави политичкиот аналитичар Арсовски.
Опасноста од безвластие и правен вакуум
Мислам дека мандатот на Собранието истекува кон крајот на ноември. Ако до тогаш не успееме да организираме избори ќе се соочиме со сериозен вакуум во недостаток на мандат. Теоретски, пратениците можат да си го продолжат мандатот до терминот кога ќе можат да се организираат избори, Уставот тоа го дозоволува, но ние ќе влеземе во правна недореченост ако не успееме да организираме избори пред да истече мандатот на сегашниот состав.
Политичко профитерство во време на криза
-Секаде во Европа каде што владите релативно пристојно се справуваат со кризата рејтингот минимално им расте. Профитерството расте секаде, не само во регионот. Но имајте предвид дека во време на изолација луѓето следат се – ги читаат сите медиуми и таквото политичко профитерство не им носи ќар на оние кои се обидуваат да го спроведат. Сега релативно лесно на површина испливуваат лажните вести и ефтините политички трикови, вели Арсовски.