Артан Садику: На општеството му се потребни нови идеи, почнува КРИК фестивал за критичка култура
„Јазол – привремено постоење, анксиозност и загубена иднина“ е темата на шестото издание на „КРИК“ – фестивал за критичка култура кој започна на 31 август и ќе се одржува до 25 септември. Организатор на фестивалот е „Контрапункт“.
„Темата на фестивалот ја осмислувавме минатата година, која беше година на безилез, кој и сега се враќа и затоа се вика ‘Јазол’, бидејќи од сите страни можни решенија кои можеа да се дадат за таквиот јазол, кој пред се’ е здравствен, психолошки, општествен, политички јазол немаше излез, затоа можеби темата звучи песимистички, но тоа е и провокација или повик преку различните форми на уметност и култура и со гостите кои оваа година ќе бидат присутни да се потрудиме да изнајдеме некои идеи за излез преку различни медиуми. Сите постоечки или наследени форми на мислење, на делување и на планирање за иднината кои досега се одржувале и практикувале и станале индивидуална и лична, но и дравна политичка пракса се покажаа како неодржливи и дека не можат да одоговорат на поголеми општествени глобални пореметувања, дека нашите општества и нашите политички системи, социјални, здравствени системи и општествени мрежи на поддршка не биле подготвени преку колективно градење и мислење на иднината која може да донесе секакви предизвици, туку, на некој начи, фунционирале денес за утре.
Токму затоа тие теории и мисли, односно политички идеи кои владееле до денес се соочија со ѕид, а тој ѕид мора да се премести, да се прескокне и со помош на теорија и преку општествена пракса. Нашиот фестивал го гледаме како теориско практичен фестивал кој вклучува и уметници, теоретичари, и филозофи за кои мислиме дека здружено би можеле да најдат и нов дискурс, нов јазик и ново мислење, а и нова пракса која ќе не’ подготви за уште потешки предизвици. Затоа оваа година имаме и филмови, претстави, перформанси, дискусии, промоција на книга. Програмата што ја објавивме за месец септември поради комплицираноста на ситуацијата ќе се дополни и со други гости со кои се’ уште разговараме“, вели за Утрински брифинг, Артан Садику, еден од програмските уредници на фестивалот.
Вечерва на програмата на КРИК во Музејот на современа уметност, со почеток од 18,30 часот ќе се одржи предавање на познатата Катрин Малабу на тема „Жена, женско, трансфеминизам: алтернативи или дилеми?“ – проследено со дискусија модерирана од Петар Милат и Славчо Димитров.