Битиќи: Светската криза не може да нѐ одмине, но битно е да се спасат семејствата и малите бизниси

Ако францускиот претседател Емануел Макрон изјави дека Франција се наоѓа во состојба на воена економија, јавноста ја интересира како се дефинира македонската економија среде оваа воена криза во Украина која предизвика криза со енергенсите од кои зависи производството, а оттука и граѓаните. За ова и за горливите економски прашања денес во Утрински брифинг разговаравме со Фатмир Битиќи, вицепремиер за економски прашања.

-Ние не го нарековме ова воена економија, туку рековме дека сме во тешка економска сотуација затоа што сме извозно и увозно зависна земја. Ако ова може да им се случува на Франција или Германија, не може да се очекува кризата да ја одмине Македонија како мала економија. Војната во Украина сѐ уште трае и не се знае кога ќе престане. Кризата со гасот кулминира, – изјави Фатмир Битиќи, вицепремиер за економски прашања за Утрински брифинг.

Во однос на наглото зголемување на цените по завршувањето на мораториумот наложен од Владата за оснвните прехранбени производи, Битиќи вели дека по неговата изјава во јавноста дека се случува неоправдано, вештачко зголемување на цените и откако инспекциите беа пуштени на терен, цените се вратија или стагнираат, па се чини дека помага покажувањето со прст на одреден факт и неморално однесување.

-Во време на криза не можеш да се однесуваш како воен профитер, а знаеме како завршуваат воени профители. Јас не влијаам и не интервенирам на слободниот пазар, но апелирам на моралните вредности на стопанствениците кои треба да ја имаат предвид општата ситуација, – вели Битиќи.

Битиќи вели дека буџетската потрошувачка се планира среднорочно оти ни во време на криза не може да се планира од ден за ден.

За ребалансот на буџетот кој е веќе во собраниска процедура, опозицијата вели дека е задоцнет, но Битиќи вели дека ребалансот е нужен и сите мерки што се преземаат треба да бидат во функција на помош на граѓаните ти тие се оние кои го полнат буџетот. – Нека каже опозицијата каде има држава која сама си го полни буџетот. Јас никогаш не сум слушнал за такво нешто, вели Битиќи.

За поскапувањето на месото при што пилешкото и говедското се поскапени драстично за разлика од свинското, Битиќи вели дека причината за тоа е што свинското месо е од домашно производство, а има и дозволи за увоз па пазарот е презаситен. Тој вели дека постои и разлика во типот на исхрана на животните која за пилињата е поскапа, па оттука пилешкото месо е повеќе поскапено.

-Притисокот врз буџЕтот е голем. Исто како и за време на ковид пандемијата. Првите пакети мерки беа за сите, а потоа за најранливите категории граѓани и компании. Така ќе биде и сега, вели Битиќи за најавените мерки за помош кои би требало да почнат да се применуваат од август.

Во однос на најавите дека струјата во јануари речиси ќе се удвои, а во пресрет на новиот тарифен модел на наплата на струјата, Битиќи вели дека рамноправно трошење на субвенционирана електрична енергија мора да има.

-Вие знаете дека 17 семејства во државата трошат 30 отсто од струјата наменета за домаќинствата. И тоа не е фер, вели Битиќи.

За државната задолженост Битиќи вели дека не треба да има грижа сѐ додека задолжувањата се продуктивни.

-Продуктивно задолжување не е само да се позајми за да се изгради пат, туку и да се спасат семејства и мали семејни бизниси, вели Битиќи.