Блажева: Да не дозволиме стравот да завладее со нашето секојдневие

Гостинка во „Утрински брифинг“ на „Слободна ТВ“ беше д- р Ана Блажева, психотерапевт и научен соработник во Институтот за општествени и хуманистички науки Скопје.

Во ситуација на пандемија, на светско ниво постои страв од неизвесност. Често се зборува за паника, но треба да се знае што всушност претставува таа.

-Јас би зборувала повеќе и за стравот, бидејќи во основа паниката е манифестација на страв. Она што е важно во овие моменти е да знаеме дека стравот е силна, моќна емоција, реакција, кога се соочуваме со закана, без разлика дали е реална или на некој начин антиципирана. Реакциите на стравот можат да бидат најразлични. Сите манифестации на некој начин, се во функција на нашата заштита. Затоа има толкава сила и моќ.

Ние денес живееме во комплексен свет. Кога се плашиме, тоа може да најде безброј варијанти како ќе се манифестира и на некој начин целата комплексност придонесува и да се чувствуваме недоволно сигурни во моментот на информациите кои ги имаме и институциите кои треба да ги спроведуваат мерките за заштита, вели Блажева.

Потребно е граѓаните да направат разлика меѓу паниката и стравот.

-Она што сега го нарекуваме паника е во ситуација во која нешто ново се случува. Треба да го смениме целосниот начин на функционирање. Тоа го носи стравот од непознатото, кое може да предизвика силна реакција. Паниката е одговор на нешто што е моментално и се чувствуваме дека сме под дирекна закана. Оваа ситуација не е моментална закана, туку еден предизвик, кој ние треба да почнеме да го прифаќаме и да се адаптираме. Кога викаме паника, мислиме на начини на нерационално однесување, но тие се повеќе реакција на нашиот страв. Во оваа ситуација е нешто што бара од нас да направиме големи промени во секојдневното функционирање, објасни Блажева.