Владимир Ангелов: Моите прогнози за „Медена земја“ се 2:0 за нас
Директорот на Кинотеката на Северна Македонија, Владимир Ангелов, прогнозира дека филмот „Медена земја“ ќе ги освои двете награди „Оскар“ за кои е номиниран македонскиот документарен филм во категориите за најдобар странски и најдобар документарен филм.
Знам дека еден од фаворитите е „Паразит“, но мислам дека тој речиси го има остварено својот максимум, така што типувам на „Медена земја“. Иако и ништо да не освоиме, ова е голем успех.
Владимир Ангелов
Не толку затоа што сме стигнале до финалето на Оскарите, со две номинации и што на таа гламурозна вечер ќе бидат нашите претставници. За мене е поважно тоа што кога го прикажувавме филмот во кино салата на Кинотеката, се плашев оние популарните „тапкароши“, значи филмот „Медена земја“ заедно со „Врба“ ги врати луѓето во кино салите.
Се надевам дека тој тренд ќе продолжи. И од тој аспект го мерам успехот на „Медена земја“, рече Ангеов. Тој рече дека фокусот на Кинотеката е авторскиот а не комерцијалниот филм.
Ангелов најави година богата со различни програми. „Идниот месец имаме претставување на турскиот филм, презентација на југословенската кинематографија и на српскиот филм. Очекуваме гости, соработуваме со Скопје филм фестивал, со Филозофскиот филмски фестивал, ќе го истакнам фестивалот на ромскиот филм „Златно тркало“.
Во рамки на „Скопје филм фестивал класик„ ќе имаме десетина филмови со Чарли Чаплин. Годинава се одбележува стогодишнина од раѓањето на големиот Федерико Фелини. Во соработка со Националната кинотека во Рим, ќе прикажеме 11 реставрирани филмови од неговиот опус.