Габер: Државниот систем мора да функционира појако, особено во дипломатијата
Во Министерството за надворешни работи во тек е ветинг на дипломатскиот кадар и веќе се поделени два отказа на вработени кои не ја поминале проверката. Следен на ред е ветинг на безбедносните сертификати кои ги поседуваат вработените во МНР. За овие теми и состојбите во дипломатијата во денешен Утрински брифинг разговаравме со дипломатот од кариера Виктор Габер.
-Не знам зошто се употребува зборот ветинг, кога ние имаме убав збор проверка. Тоа е проверка на безбедноста, лојалноста на одреден службеник да врши некои работи. Ако проверката ја вршиме откога дипломатот е испратен некаде да ја претставува земјата, тогаш доцниме, вели Габер за Утрински брифинг.
Тој потсетува на двата кокурса за дипломати во деведесеттите години кога била извршена проверка на кандидатите во различни области како што се познавање јазици, бон-тон, култура и на крајот кандидатите биле испитувани од психолози од МВР.
-Кога некој млад, образован и амбициозен човек ќе влезе во МНР за да придонесе за себе и за земјата, проверката отпосле е многу тешка. Кога велиме да се спроведен ветинг на сите тие 600 луѓе кои работат во МНР треба да знаеме дека тоа е тешко. Самата ситуација со овој скандал со Ерменија и апсењето на наш дипломат го насочи МНР кон таа процедура, но таа не дава такви резултати како кога би се вршела соодветна проверка при прием на кандидати, пред тие да ги поминат сите скалила. Немаме потреба од ветинг кога штетата е направена, вели Габер за Утрински брифинг.
Тој вели дека дипломатијата страда од политички кадровски решенија поставени од политичките структури, а дека нивната масовност овозможува да се случи ваков скандал.
-Ние сме во турбуленција од 1991 година и градиме нов систем и многу е тешко да се преструктуира едно општество и притоа да нема штети. Системот треба да легне. Да сфатиме што ни е целта и со кои средства да ја постигнеме таа цел, а да не биде тоа неморално, претставува тежок процес, вели Габер.
Од последниот дипломатски скандал, но и од претходните, македонската дипломатија треба да извлече поука како треба да се движиме понатаму. Тоа што немаме амбасадори во клучни земји, според Габер е знак дека не сме добро отганизирани и дека кадровската политика во МНР зависи од политички комбнаторики.
-Дипломатијата носи информации, но ако поединецот не е квалификуван да ги вреднува тогаш џабе е дипломат. Отсуство на амбасадор влијае врз билатерални односи, не само политички туку и економски и во сферата на културата, вели Габер.