Гаговска: Има напредок кај медиумите во известувањето за сексуално вознемирување и Јавна соба

Коалицијата Маргини, со поддршка на Фондацијата „Хајнрик Бел“, изработи истражување на медиумското покривање на темите поврзани со ЛГБТИ заедницата и родово-базираното насилство. Дел од тој извештај е студијата на случајот „Јавна соба“, односно како известувале медиумите за него во текот на 2020 и 2021 година.

„За случајот „Јавна соба“ со дозна во јануари 2020 година, се работеше за група на „Телеграм“, каде членуваат илјадници луѓе и каде што се споделуваат експлицитни фотографии, профили на социјални мрежи, телефонски броеви и лични податоци на девојки и жени – без нивна согласност и тоа беше сексуално вознемирување и родово засновано насилство. Оваа група прилично брзо беше затворена од страна на Министерството за внатрешни работи, но се’ уште нема ниту едно лице кое би одговарало и би било казнето. Во 2020 година имаше силни реакции од јавноста, но имаше и многу наративи кои ги обвинуваа жртвите. Но, во 2021 година кога повторно се појави овој случај, се променија наративите, но остана скандалозниот аспект дека повторно никој не одговараше,а девојките и жените не добија правда. Под ракводство на извршната директорка на Коалиција Маргини, Ирена Цветковиќ и заедно со Мања Величковска, се изработи поширок извештај за медиумите, родот и сексуалните малцинства. Во студијата на случајот „Јавна соба“ споредувавме содржини напишани во медиумите во 2020 и 2021 година, односно нивна компаративна анализа. Еден од наодите е дека во 2020 година овој случај бил многу помалку застапен во медиумите, за разлика од оваа година кога имало многу поголем интерес од медиумите. Исто така, претходната година, имало повеќе написи каде биле обвинувани самите жртви, додека оваа година речиси сите прилози жртвите ги нарекуваат жртви. Претходната година фокусот бил на малолетничките и се пишувало сензационалистички, наспроти ова бидејќи во јавност излегоа некои од жртвите кои се возрацни многу поточно се врами целиот случај на „Јавна соба“ и му се даде човечко лице, што не се случи претходната година. Еден од клучните наоди е дека додека во 2020 година, се пишуваше дека е тоа проблем на младите и се обвинуваа родителите, наспроти тоа, годинава вината се бара во јавната сфера, кај државните институции кои не го разрешиле случајот“, вели за Утрински брифинг Елена Гоговска, истражувачка.

Според неа, а како резултат од истражувањето на тоа како медиумите известувале за „Јавна соба“, има напредок во начинот на известувањето за родово базираното насилство, иако се’ уште особено во колумните обвинувања за жртвите.