Георгиевски: Затишјето викендов говори дека нешто во позадина се крчка – ќе видиме дали ќе се дојде до решение пред Самитот на ЕУ

Затишјето што се случи викендов дава некој сигнал дека нешто во позадина се крчка. Ќе видиме дали ќе се дојде решение и какво ќе биде тоа. Мислам дека следниве денови ќе мора да дознаеме, бидејќи доколку има тоа ќе мора да биде објавено пред почетокот на Самитот, изјави во Утрински брифинг главниот уредник на македонскиот сервис на Дојче веле, Борис Георгиевски.

-Очигледно е дека сите јасно укажуваат и факт е дека никој не дозволува во преговарачката рамка да влезат бугарските барања. Каков договор ќе постигнат Македонија и Бугарија земјите членки на ЕУ не се мешаат и оставаат двете земји да го решат тоа, вели Георгиевски и додава дека станува очигледно дека откако стана поизвесна победата на Бајден пораките од САД стануваат посилни.

-Од тоа имаме корист, бидејќи се гледа дека јасно се укажува дека САД проблемите сакат да се надминат, но не по секоја цена.

-Бевме сведоци на едно несмасно интервју кое предизвика многу реакции. Доколку се научи лекцијата и биде постигнат договор, многу е битно како тоа ќе се пренесе. Еден белгиски историчар деновиве изјави дека решението е во еден ведар национален нихилизам. Но, тешко е да се батали историја во овој регион и факт е дека бугарската страна не помага со испратените пораки. Проблем е и што кај нас некои работи долго време не се објаснуваа и луѓето се најдоа погодени од некои работи кои се случуваат минатиов период.

Разговорот со уредникот на ДВ на македонски, Борис Георгиевски, погледнете го во видеото