Георгиевски: Традиционалните медиуми ја изгубија улогата на неутрален, објективен медијатор на целата јавна комуникација и информирање

Валкана кампања може да се случи. Таква е состојбата, работите ескалираат кон екстреми. Традиционалните медиуми ја изгубија својата улога на центристички, неутрален, објективен медијатор на целата јавна комуникација и информирање, така што сме препуштени како публика на одлуката на било кој, кој што сака да комуницира со нас, на кој начин ќе го прави тоа.

Глобален тренд е најдобро да се слушаат тие што викаат најгласно, така што тоа се случува секаде во светот, тешко се контролира и не би ме изненадило ако тоа ги премине тие граници на пристојност и биде една валкана кампања, изјави во Утрински брифинг Дејан Георгиевски од Центарот за развој на медиуми, во врска со последната изјава на премиерот Спасовски кој најави дека е можно да се случи највалкана изборна кампања оваа година.

Генерално таа јавна полемика која што ја водат партиите меѓу себе е од типот „овие се вакви, па другите ќе одговорат, тие се уште полоши“ и сето ова мислам дека ќе биде тешко да се збегне и затоа одговорноста не е на граѓаните туку кај организаторите на изборните кампањи. Тие за жал ќе ја водат кампањата онака како што сметаат дека е најдобро за нив, додаде Георгиевски.