Гоце Павловски: Културата да престане да служи за политички пазар

Синдикатот ги поддржува уметниците и професионалците кои не се вработени во институциите, туку работат како хонорарни соработници или се дел од независната културан сцена. „Имаме информации дека голем дел од вработените коишто во институциите се ангажирани со времени договори не се исплатени. Такви ситуации има во Археолошкиот музеј и во Музејот на современа уметност, каде што има луѓе кои немаат земено плата за декември, па и за ноември“, вели за Утрински брифинг, Гоце Павловски, секретар на Синдикатот на култура (СКРМ).

За тврдењата дека директорите на кулурните институции, како што е Центарот за култура „Антон Панов“ во Струмица се избираат според блискост до партиите на власт, а не по стручност, Павловски вели со децении политичарите се однесуваат кон културата како нешто маргинално, нужно но непрофитабилно зло, кое што е единствено добро за политички пазар. „Впрочем видовте, во изминатите шетири години имавме смена на четворица министри. И втората работа е клиентелизмот. Некогаш се назначуваат директори кои се блиски до партијата или партиите на власт, наместо да се назначуваат професионалци што не е типично за нормални европски земји. Не можете на институции кои што бараат професионални кадри, директори кои треба да ја познаваат проблематиката да назначувате директори со некакво сосема различно образование како сега во случајот на Центарот за културата „Антон Панов“ во Струмица, каде е назначено лизе со образование од физичка култура.

Самиот закон налага пет години искуство во културата, а се случува некои и да ја изигруваат оваа одредба па да земаат потврда дека пред 30 години биле дел од некаков проект. Во конкретниов случај во Струмица, имате уште двајца кандидати со магистериум од културен менаџмент и тоа завршен на англиски јазик, а другиот кандидат е актер од истата куќа и тие не се примени со образложение од Министерството за култура дека едниот нема сертификат за англиски јазик, а другиот дека нема потврда за работен однос. Во оваа ситуација не е пресуден серификатот за англиски јазик бидејќи во најголем број случаи сертификатот има одложена примена, луѓето прво конкурираат, ги избираат па потоа имаат обврска да приложат сертификат. Впрочем се гледа кој има соодветно образование а кој не, комисијата го предложила кандидатот а министерката го прифатила мислењето на комисијата и треба да сносат одговорност. Во Стратегијата за култура 2018 – 2022 еден од приоритетите е департизацијата, значи да не ни се повтори тоа што се случуваше во изминатиот период, а всушност се направи некаква алтернативна партизација. Редно време е да сфатиме дека културата не е за политички пазар, туку е темелна вредност“, вели Павловски.