Димитриевски: Од политика фајде не видовме, треба менаџерски да се управува за потребите на граѓаните
Вчера Давид го победи Голијат, а тоа се покажаи на изборите во Куманово, ја коментираше за Утрински брифинг победата на фудбалската репрезентација на Македонија против Италија поврзувајќи ја со локалните избори Максим Димитриевски, градоначалник на Куманово.
-Кога се граѓаните со вас е лесно, кога се против е тешко. Чувствувам голема поддршка, да креирам позитивни политики. Нашиот тим е сериозен кој успеа да покаже како се работи, а тоа што можеме да помогнеме на државно ниво ќе помогнеме. Партијата требаше одамна да ја препознае нашата работа. Имам контакти и со луѓе од партијата и со опозицијата оти јас излегов како независен кандидат. Постојат само добри и лоши луѓе, друго поделби не смее да има, вели Димитриевски за Утрински брифинг.
Тој вели дека во првите стотина дена има 40-ина реализирани проекти затоа што постои континуитет во општинските власти, а сега се работи на изградба на нов кружжен тек и се реконструира стариот градски парк во Куманово кој ќе стане модерен, урбан смарт парк.
-На Куманово оваа година ќе му недостасуваат само 20 милиони денари за да се плати струјата во средните училишта, а за другото се снаоѓаме, вели Димитриевски кој вели дека успева да штеди во општината и Куманово сега веќе не е една од четирите најзадолжени општини.
Тој вели дека долговите се расчистени поради работењето на општинскиот тим и поради тоа што граѓаните навремено си ги подмируваат обврските. Според него, сите институции кои се пренесени на општини од државно ниво, како што се старските домови, градинките и образованието, треба да бидат поддржани од државата.
-Јас сум спремен сите овие пренесени обврски да ги вратам назад на Владата. Очекувам мојот сограѓанин, премиерот Ковачевски, да ме повика да разговараме. Општините не бараат помош, бараат само да се почитува законот, вели Димитриевски.
Сите политички субјекти што се во Советот на општината беа поканети да влезат во мнозинството, но СДСМ веднаш одби, но како што одминува времето се појави свесност и повеќе одлуки поминуваат со консензус, вели Димитриевски за Утрински брифинг.