Евтаназија на животни – За или против

Јас не сум стручњак за заразни болести. Работам хирургија. Не се наоѓам повикан за заразни болести. Кај нас има експерти кои тоа го работат. Јас не слушнав дека некој на состанокот со Шилегов рече дека некои болести се неизлечиви. Неизлечиво е само беснилото.

Некои животни може да се излекуваат, некои угинуваат. Не знам зошто толку жолч се изли за болестите. Мене друго ми смета и сакав да го кажам. Ние сите подлегнуваме на некаква контрола и рецензија. Не е пристојно некој што не ги знае работите или пак прочитал нешто на интернет, коментира толку стручно за кое дури и ние не се чуствуваме стручни.

Дискутираат на високо-научно ниво а немаат обука од основна медицина. Легално право им е, не се единствени да бараат да нема евтаназија. Значи нивното право може да се почитува, но не мора да се прифати. Има други и од стручната јавност кои велат дека евтаназијата е дел од праксата и ветеринарна обврска за случаи каде ние сметаме дека животното неможе да биде излечиво или страда.

Значи тогаш препорачуваме, а не го правиме тоа на сила. Ако сакаме да бидеме нормална држава и да ги почитуваме меѓународните правила и закони, треба да знаеме дека светски организации велат дека животните кои се потенцијални ширачи на болести, независно дали се заразни само за животните или и за луѓето , не смеат да бидат пуштени да бидат слободни, значи мора некако да се контролираат. На крајот на краиштата имаме кривични закони – како што е заштита на луѓето од заразни болести.

Практиките за бездомни животни покажува дека евтаназијата е легална скоро во сите земји во Европа, изјави за Утрински брифинг, проф. д-р Пламен Тројачанец.