Екипата на„Медена земја“: Го остваривме својот сон

Авторите на „Медена земја“, Љубомир Стефанов, Тамара Котевска, Самир Љума, Фејми Даут, Атанас Георгиев и нивната хероина Атиџе Муратова, утрово им се обратија на македонските медиуми преку онлајн пресконференција во МКЦ. Нивната порака ја пренесе Атиџе која испеа песна посебно за оваа прилика.

„Ова што го доживеавме е навистина посебно искуство. Ова го сонував 20 години откако почнав да се занимавам со оваа професија“ рече Даут.

Режисерката Котевска пак кажа дека доделувањето на Оскарите бил навистина прекрасен настан. „Најважно од се беше што дојде и Атиџе, а ние со филмот го направивме своето, нашата порака е пренесена“.

За Љубомир Стефанов најважно е што овој филм е направен со малку пари а со многу ентузијазам и посветеност.

Монтажерот и продуцент Атанас Георгиев рече дека одсега поинаку ќе се гледа на документаристиката и дека овие две номинации се огромен успех што ја променија и историјата на Амеркинаската академија. „Ова значи дека уште повеќе публика ќе го види филмот, ќе ја слушне нашата порака, а тоа е најважно за секој автор“ рече Георгиев.

Не сме разочарани истакнаа авторите, напротив ова е огромен успех. На прашањето што ги чека следно Атиџе рече дека и е доволно од интервјуа зашто има работа со пчелите. Љубомир Стефанов кажа дека негов следен проект е анимиран филм, а другите автори сеуште ги средуваат впечатоците и идеите за следните проекти.