Ирена Цветковиќ: Во моментов речиси не постои учебник кој задоволува минимум критериуми за квалитет
Реформите што се предвидуваат во Предлог законот за учебници и други наставни и дидактички материјали ќе значат напредок во образовните политики, особено од аспект на родовата еднаквост и недискриминацијата во образованието, смета Ирена Цветковиќ, извршна директорка на Коалиција Маргини.
„Во Коалицијата Маргини веќе подолго време се занимаваме со проблемот со дискриминаторските содржини во нашите учебници и она што го увидовме е дека обидите да се променат еден по еден учебник секогаш кога ќе наидеме на дискриминаторска содржина, за жал кога велам да се променат тоа најчесто беше да се избрише и ништо повеќе да не се интервенира, се покажаа нецелисходни бидејќи речиси не постои учебник, кој што се користи во основното и средното образование, а кој задоволува минимум критериуми за квалитет. Од 2014 година Коалицијата се застапува за измена на Зконот за учебници, оној што денеска го имаме предлог закон за учебници и други наставни и дидактички материјали и да се започне со комплетна и сеопфатна ревизија на сите учебници во основно и средно образование. Дискриминаторските содржини кои ние тргнавме да ги откриваме беа можеби и иницијалниот проблем со кој се соочивме, но не беа единствените. Клучен проблем кој се обидува овој предлог да го реши е застареноста на учебниците. Работев на една анализа на учебници за основно образование и уште сум шокирана од она што го прочитав.
Во нашите учебници за основно и средно се зборува како да живееме во 19 век, се зборува за „лепрозни“, за една реалност која едноставно младите денес не ја живеат. Потоа, нашите учебници содржат и голем број неточни дефиниции и кои оставаат генерации со погрешни знаења. И конечно, дискриминацијата беше клучен проблем, понекогаш во учебниците можете да наидете на говор на омраза кој денес ни во медиумите нема да го најдете, тоа е нешто на ниво на она што го имаме на социјалните мрежи како реалност и претставување на еден многу тесен свет, тоа е свет на бели хетеросексуални мажи, значи комплетно отсуство на различни категории на граѓани и групи граѓани во учебниците. Да, ние тргнавме да испитуваме колку жените или ЛГБТИ луѓето се застапени, но видовме дека во нашите учебници нема место ниту за етничките други, ниту за луѓето со попреченост, ниту за еднородителските семејства што значи дека тие учебници не ја отсликуваат реалноста што ја живееме и заради тоа се неинтересни за младите и заради тоа не мотивираат интерес и жед за учење и знаење“, вели Цветковиќ за Утрински брифинг.
Таа рече дека родителите што се спротивставуваат на реформите во образованието поддржуваат опасни проблеми во општеството затоа што да се биде против родово сензитивното образование значи да се премолчува родово заснованото насилство и да не се зборува за се’ помасовните форми на насилство и сексуално вознемирување кои најмногу се штетни токму за девојчињата.