Истражување на Ромалитико: Ромите се најдискриминирана заедница во Македонија
Институтот за истражување и анализа на политики „Ромалитико“ – Скопје, спроведе Истражување за степенот на доверба помеѓу етничките заедници коишто живеат во Република Северна Македонија кое што покажало дека најприфатливи за соседи, пријатели, брачни партнери, соработници, вработени итн. се припадниците на мнозинската заедница, односно припадниците на македонската етничка заедница, додека најмалку прифатена, воедно и заедница којашто ужива најниска доверба од другите заедници е ромската заедница. Мухамед Ајваз кој работел на истражувањето денеска на Утрински брифинг рече дека според добиените податоци, јасно може да се забележи тренд којшто укажува на тоа дека образованието има важна улога во унапредувањето на односите помеѓу етничките заедници.
-Според податоците, образованието игра важна улога во довербата и отвореноста кон другите заедници, така што воглавно испитаниците коишто имаат повисок степен на завршено образование имаат и поголема толеранција и отвореност за соработка со другите заедници во однос на дел од прашањата. Доколку се споредат бројките од 2008 година до сега, зголемен р бројот на запишани средношколци и студенти, што даде придонес во намалувањето на бројот на невработени роми, но Ковид кризата повторно предизвика голема невработеност кај младите роми, вели Ајваз. Втора најприфатена заедница според испитаниците се припадниците на турската етничка заедница.
-Втора заедница, по ромската, како заедница со која најмалку би соработувале и имаат најниска доверба е албанската етничка заедница, којашто пак е перцепирана од испитаниците како најпривилегирана заедница во државата. Ова истражување за степенот на доверба е од исклучително значење за односите помеѓу различните заедници во Македонија, и укажува на важноста на креирање на инклузивно образование и потребата од практично спроведување на стратегијата за Едно општество, вели Ајваз. Во однос на полот, воглавно, жените повеќе би сакале соработка со припадници на други заедници од мажите, а единствено мажите се повеќе отворени за стапување во брак со припаднички на други заедници од жените.