Катерина Илиевска Силјановска: Децата и младите да не заборават да одат во театар

Театарот за деца и млади го прослави својот 30 – годишен јубилеј со промоција на монографијата „30 години Театар за деца и младинци – Сон што трае“, а директорката Катерина Илиевска Силјановска се надева дека оваа лоша година со пандемијата нема да ја одвикне нивната публика да доаѓа во театар.

„За иднината на Театарот е најважно да се учат децата и младите да доаѓаат во една таква интерактивна институција затоа што технологијата не’ окупира се’ повеќе и мислам дека е значајно да ја задржиме онаа публика веќе ја имаме со години наназад и оваа лоша година што ни се случи да не не’ навикне да не одиме во театар.

Мислам дека е многу важно децата и младите да продолжат да следат театарски претстави, да излезат од она што се’ повеќе е младешко секојдневие кое го поминуваат со телефоните“, вели Илиевска Силјановска за Утрински брифинг.

Таа рече дека Театарот и покрај здравствената криза подготвува нови претстави. „Моментално подготвуваме младинска претстава за насилството меѓу младите што е исклучително актуелна тема“.